ସ୍ମୃତି ଅନୁଭୂତି

ଜୀବନର ଏଇ ଛକି ଶୂନ ଖେଳେ

    କିଛି ସ୍ମୃତି ଅନୁଭୂତି 

ଏଇ ସଂସାରରେ ସଭିଙ୍କ ଜୀବନେ 

    ଉଙ୍କି ମାରିଥାଏ ନିତି।

ପିଲାଦିନ ସ୍ମୃତି ଅତି ଆପଣାର

   କେବେ ଭୁଲି ହୁଏ ନାହିଁ 

ବାପା ମାଆ କୋଳେ ସ୍ନେହ ମମତାର

    କୋମଳ ପରଶ ସେହି ।

ସାଙ୍ଗ ସାଥି ମେଳେ ବାଲି ଧୂଳି ଖେଳ

     ଖେଳୁ ପୁଣି ଲୁଚ କାଳି

କବାଡି ଓ ପୁଚି ବୋହୂ ଚୋରୀ ପୁଣି

    ମିଛି ମିଛି ଭାତ ଡାଲି।

କାହିଁଗଲା ସେହି ଅତୀତ ସୁଦିନ

    ଭାବିଲେ ଲାଗଇ କଷ୍ଟ

ସଂସାର ଜଞ୍ଜାଳେ ଛନ୍ଦି ହୋଇ ଯାହା

    ହେଉଅଛି ଛଟ ପଟ।

ସବୁ ଅନୁଭୂତି ସ୍ମୃତି ରୂପେ ଆସି

   କଳ୍ପନାରେ ଦେଖାଦିଏ 

ସେ ସ୍ମୃତି ସାଇତି ଜୀବନେ ମନୁଷ୍ୟ 

   ନିଜକୁ ସାନ୍ତ୍ବନା ଦିଏ।