ସଖୀ
ସଖୀ
ସଖୀ ତୁମେ ଏକ ତୋଫା ଜହ୍ନରାତି
ମନ ଗହନର ନିଆଁ
ସଖୀ ତୁମେ ଏକ ଅସରା ଶ୍ରାବଣ
ମଳୟର ମୃଦୁ ଛୁଆଁ I
ଆଖିରେ ତୁମର ପ୍ରବାଳ ଦୀପର
ଝିଲିମିଲି ରଙ୍ଗ ଜ୍ୟୋତି
ତୁମେ ସଖୀ କେଉଁ ସାଗର କୂଳର
ଶାମୁକା ଗର୍ଭରେ ମୋତି I
ଅଳସୀ ନଈର କୁଳୁ କୁଳୁ ସ୍ୱନ
ତୁମେ ଭିଜା ଭିଜା ମାଟି
ତୁମେ ଶ୍ୟାମଳିମା ସବୁଜ ବନାନୀ
ଚିର ପ୍ରତୀକ୍ଷିତ ପ୍ରୀତି I
ବର୍ଷାହୋଇ ତୁମେ ଛୁଇଁଦେଲେ ମୋତେ
ମନେ ଭରେ ଶିହରଣ
ତୁମରି ଓଠରେ ହସ ଦେଖିଦେଲେ
ଆନମନା ହୁଏ ମନ I
ତୁମେ ମୋ ମନର ଆକାଶରେ ସଖୀ
ଜହ୍ନ ହୋଇ ଗଲେ ଉଇଁ
ହୃଦ ସରୋବରେ ତୁମ ଆଖି ଦୁଇ
ପାଲଟେ ଲୋ ନୀଳ କଇଁ I
ବରଷା ରୂପରେ ତୁମକୁ ଦେଖିଲି
ମନ ହୋଇଗଲା ଖୁସି
ଜହ୍ନହୋଇ ଯେବେ ଜୋଛନା ଢାଳିଲ
ମୁଁ ଦେଲି ଟିକିଏ ହସି I