ଶ୍ରମର ଜୟ ଜୟ

ଆମେରେ ଶିଳ୍ପୀ ଶ୍ରମିକ ଆମେ

   ଆମେରେ କାରିଗର

ମାନୁନା ଆମେ ବାଆ ବତାସ

   ଖରା କାକର ଡର l

ଆମେ ଗଢ଼ିଲୁ ଅମରାବତୀ 

   ରାବଣପୁରୀ ଲଙ୍କା

କୋଣାରକରେ ରବି ମନ୍ଦିର

  ହୁମା ଦେଉଳ ବଙ୍କା l

ବଡ଼ ଦେଉଳ ଶ୍ରୀ ଲିଙ୍ଗରାଜ

  ଆମେ ଯେ ତାର ହେତୁ

ଆମେ ଗଢ଼ିଲୁ ତ୍ରେତୟା ଯୁଗେ

  ଲଙ୍କାକୁ ରାମସେତୁ l

ଆମେ ଗଢିଲୁ ସଡ଼କ ସୌଧ

   ରେଳ ଜାହାଜ କଳ

ଦେଶ ପ୍ରଗତି ଆମରି ହାତେ

   ଆମରି ଶ୍ରମଝାଳ l

ଆମେ ଆଙ୍କିଛୁ ପଥର ଦେହେ

  କେତେ ଯେ ଚାରୁକଳା

ଆମରି ଲାଗି ଆମରି ଦେଶ

  ଜଗତେ ବଡ଼ ହେଲା l

ଖଣିରୁ ଆମେ ପଥର କାଢ଼ୁ 

   ପଥର ଦେହୁ ରତ୍ନ

ପିଠିରେ ଆମ ପଥର ବୋହି 

  ବାନ୍ଧିଲୁ ନଦୀ ସ୍ରୋତ l

ଗହୀର ବିଲେ ଖେଳାଉ ଆମେ 

   ସବୁଜ ଶୋଭା ଆଣି

ଘରେ ଘରକେ ବିଜୁଳି ବତୀ 

   କୃଷକେ ଦେଉ ପାଣି l

ଉଡ଼ାଜାହାଜ ରକେଟ ଦେଖ 

   ଆକାଶେ ଯାଏ ଉଡ଼ି

ଦରିଆ ବୁକେ ଜାହାଜ ଚାଲେ

   ବୁଡ଼ା ଜାହାଜ ବୁଡ଼ି l

ଆମ କଷଣ ନଜାଣେ କେହି

   ଖାଉରେ ମାଡ଼ ଗାଳି

ଭୋକରେ ପିଲେ ମରନ୍ତୃ ପଛେ 

  ଜଳେନା ଘରେ ଚୁଲି l

ଦେଶ ପ୍ରଗତି ଆମର ନୀତି 

   କାହାରେ ନାହିଁ ଭୟ

ଦୁଃଖ କଷଣ ଦେଶରୁ ଯାଉ 

   ଶ୍ରମର ଜୟ ଜୟ ।