ଶ୍ରୀ ରାମଚନ୍ଦ୍ର

ରାମନାମ 

ସର୍ବ ବେଦ ସାର

ରାମ କଥା କ୍ଷୀର ସମୁଦ୍ର !

ରାମ ନାମ 

ନାମ ପରି ମନୋରମ 

ସ୍ଵୟଂ ନାମୀ ରାମଚନ୍ଦ୍ରଙ୍କୁ 

ମଧ୍ୟ ଟାଣି ଆଣିପାରେ 

ଭକ୍ତ ପାଖକୁ !

ଦଶରଥଙ୍କର ପୁତ୍ର ଭାବରେ 

ପ୍ରଭୁ ଶ୍ରୀ ରାମଚନ୍ଦ୍ର 

ଅବତରଣ କରିଥିଲେ 

ଏ ଧରା ପୃଷ୍ଠରେ 

ଚୈତ୍ର ମାସ ଶୁକ୍ଳପକ୍ଷ ନବମୀ ତିଥିରେ ;

ସେତେବେଳେ 

ସମୟ , ପ୍ରକୃତି, ଗ୍ରହ, ନକ୍ଷତ୍ର 

ଯେମିତି କିଛି କ୍ଷଣ ଅନାଇ ରହିଥିଲେ 

ଭଗବାନଙ୍କ ଆଗମନକୁ ,

ଅନାଇ ରହିଥିଲେ 

ମୁନି ଋଷି ଗଣ 

ଏହି ଦିବ୍ୟ ମୁହୂର୍ତ୍ତକୁ !

ସିଏ ହେଉଛି ରାମ 

ଯିଏ ସମସ୍ତ ସୁଖର ଆଧାର ,

ରାମ ନାମର ଶ୍ରବଣରେ 

ଧୋଇ ଯାଏ ସବୁ ପାପ ,

ଜୀବନରେ ବିରାଜମାନ କରିଥାଏ 

ସୁଖ ଶାନ୍ତି, 

ଜଗତର ସବୁ ଜଳାଧାରାର ଆଧାର 

ସମୁଦ୍ର ପରି 

ସବୁ ପ୍ରାଣୀଙ୍କର ମୂଳାଧାର ରାମ !

ଶ୍ରୀରାମ ଚନ୍ଦ୍ର 

ଅମୃତ ରସମୟ 

ଲାସ୍ୟମୟ ଝରଣାର ଝର ,

ଧର୍ମ ଓ କରୁଣା 

ରାମ ଅବତାରର ମୂଳ ସ୍ରୋତ ...

ରାମାୟଣ ଗାନ କରେ 

ରାମ ନାମର ମହିମା 

ଅତି ପବିତ୍ର 

ରସମୟ କାହାଣୀ ,

ରାମ ଝର କରୁଣା ରସ 

ଲକ୍ଷ୍ମଣ ଝର ଭକ୍ତି ରସ ,

କରୁଣା ଓ ଭକ୍ତି 

ରାମାୟଣର ଦୁଇ ପ୍ରଧାନ ରସ !

ଶ୍ରୀରାମ ମୂଳସତ୍ତା 

ବ୍ରହ୍ମଙ୍କର ମୂର୍ତ୍ତୀମନ୍ତ ପ୍ରକାଶ ...

ସେ ସର୍ବଭୂତାନ୍ତରାତ୍ମା 

ସର୍ବ କାରଣ 

ସର୍ବ ମୟ

ସର୍ବ କାଳଗତ ପୁରୁଷୋତ୍ତମ !

ଶ୍ରୀରାମ କଥା 

ଶେଷହୀନ ବର୍ତ୍ତମାନ 

ଏବଂ 

ଭବିଷ୍ୟତ ସହ 

ଆଦି ଅନ୍ତ ହୀନ ସମୟର 

ଅସରା କାହାଣୀ ।

ଜୟ ଶ୍ରୀରାମ ।