ଶ୍ରୀ ବଟଗଣେଶ
ଶ୍ରୀ ବଟଗଣେଶ
ଶ୍ରୀକ୍ଷେତ୍ରରେ ଭାରି ପ୍ରତ୍ୟକ୍ଷ ଦେବତା
ସିଦ୍ଧିଦାତା ଗଣପତି l
ଶ୍ରୀବଟ ଗଣେଶ ନାମ ତାଙ୍କ ଯେଣୁ
କଳ୍ପବଟ ମୂଳେ ସ୍ଥିତି ll
ବଟଗଣେଶଙ୍କ ସମ୍ମୁଖରେ ବସି
ମାଆଟିଏ ଏକ ଦିନେ l
ପୁରାଣ ପଣ୍ଡାଙ୍କ ଭାଗବତ ଚର୍ଚ୍ଚା
ଶୁଣୁଥିଲେ ମନ ଧ୍ୟାନେ ll
ଗରିବ ମାତାଟି ପୁରାଣ ଶେଷରେ
ନ ଦେଇ ପାରି ଦକ୍ଷିଣା l
ଅପମାନ ପାଇ ଗୃହକୁ ଫେରିଲେ
ଅନ୍ତରେ ବହି ବେଦନା ll
ପୁଅକୁ ହକାରି କହିଲେ ପୁକାରୀ
ଆରେ ମୋର ପୁତ୍ରମଣି l
ପ୍ରାକୃତ ପ୍ରବନ୍ଧେ ଶିରୀ ଭାଗବତ
ପାରିବୁ କି ତୁ ବଖାଣି ?
ସଂସ୍କୃତ ପୁରାଣ ରସ ଆସ୍ୱାଦନ୍ତୀ
ପଣ୍ଡିତ ବିଦ୍ୱାନ ସିନା l
ପ୍ରାକୃତ ପ୍ରବନ୍ଧେ ଭାଗବତ କର
ଭକ୍ତ ହେବେ ଆନମନା ll
ମାଆ ପଦ୍ମାବତୀ ପୁତ୍ର ଥିଲେ ସେହି
ଓଡ଼ିଆ ଜାତି ନମସ୍ୟ l
ପ୍ରାକୃତ ପ୍ରବନ୍ଧେ ଲେଖନୀ ଧରିଲେ
କହେ ଜଗନ୍ନାଥ ଦାସ ll
ରାଧା ଅଂଶେ ଜନ୍ମି ଭାଗବତ କଲେ
ଧ୍ୟାୟି ଶ୍ରୀ ବଟଗଣେଶ l
ଓଡ଼ିଆ ଜାତିର କାବ୍ୟ କୋଣାର୍କ ସେ
ସରଳ ତରଳ ଭାଷ ll
ଶ୍ରୀ ବଟଗଣେଶ ସମ୍ମୁଖରେ ପୁଣି
ମହାପ୍ରଭୁ ଶ୍ରୀ ଚୈତନ୍ୟ l
କୋଳାଗ୍ରତ କରି ଡାକିଲେ ପୁକାରୀ
ଅତିବଡ଼ି ତୁମେ ଧନ୍ୟ ll
ନୀଳାଚଳେ ପ୍ରଭୁ ବସି ରହିଛନ୍ତି
କଳପ ବଟର ମୂଳେ l
କଳପନା କଲେ ଅନ୍ତରେ ତାହାଙ୍କୁ
ବିଘ୍ନ ଟଳେ ଅବହେଳେ ll
ଶ୍ରୀବଟଗଣେଶ ନମଃ ହେ ବିଘ୍ନେଶ
ନମଃ ଗଉରୀ ନନ୍ଦନ l
ବିଦ୍ୟା ବୁଦ୍ଧି ଦିଅ ଆହେ ମହାକାୟ
ବିଦ୍ୟାଦାତା ଗଜାନନ ll