ଶପଥ

ନିଜ ରକ୍ତ ନିଜ ହସ୍ତେ ଦେଖିଦେଇ

କାନ୍ଦୁଅଛି ବୀର ପୁତ୍ର

କ୍ଷମା କରିଦେବୁ ମୋତେ ଲୋ ଜନନୀ

ଅସହାୟ ତୋର ସୁତ ।

ତୋର ରକ୍ଷା ପାଇଁ ସୀମାପରେ ମୁଁହିଁ

ଥିଲି ସଦା କାର୍ଯ୍ୟରତ

ଆତଙ୍କବାଦୀର କୂଟଚକ୍ରାନ୍ତରେ

ପ୍ରାଣ ମୋର ଜର୍ଜରିତ ।

କାପୁରୁଷ ପରି ରାତିଅଧେ ଆସି

ବୋମା କଲେ ନିକ୍ଷେପିତ

ଭାଇମାନେ ମୋର ଅନେକ ସଂଖ୍ୟାରେ

ହୋଇଲେଣି ମୃତାହତ ।

ରକ୍ତ ନୁହେଁ ମାଆ ଏ ତୋର ମମତା

ହୋଇନାହିଁ ଭୟଭୀତ

ହସିହସି ଆଜି ବିଦାୟ ନେଉଛି

କାନ୍ଦିବୁନି ମୋର ମାତ ।

ଜୀବନ ଦୀପ ମୋ' ଲିଭିବା ଆଗରୁ

ନେଉଅଛି ମା' ଶପଥ

ପୁଣି ଥରେ ତୋର କୋଳରେ ଜନମି

ରଖିବି ତୋର ମହତ ।