ଶୀତୁଆ ସଞ୍ଜ

ଅମାନିଆ ଶୀତ ଆସେ ଧୀରେ ସେତ 

   ଖାତିରି ନକରି ତାପ

ସୂର୍ଯ୍ୟାସ୍ତ ପୂର୍ବରୁ  ଶୀତେ ଆମେ ଥରୁ

   ମଳିନ ଆଦିତ୍ୟ କୋପ ll

ସଞ୍ଜ ଆସେ ଧାଇଁ  ରାତି ସରେ ନାହିଁ

    ଉତ୍ତରା ପବନ ବହେ

କାକର କୁହୁଡି  ସାଥିରେ ଆଣିକି

     ଥଣ୍ଡାକୁ ଧରଣୀ ସହେ ll

ନୀଳିମା ଆକାଶ ଧବଳେ ପ୍ରକାଶ

    ନଭରୁ ଝରେ ଶିଶିର

ପିନ୍ଧି ଶୁଭ୍ର ବସ୍ତ୍ର  ସଞ୍ଜ ଉପଗତ

     ହସ ଶଶି ମନୋହର  ll

କୋହଲା ପବନ  କାଲୁଆ କରଇ

     ଦେହ ହାତ ଯାଏ ଶୁଖି

ଜଳକୁ ଛୁଇଁଲେ  ଶରୀର କମ୍ପଇ

    ମଳି ଦେହେ ଯାଏ ଲାଖି ll

ଆଗୁଆ ଶୁଭଇ  ସ୍ୱର ଶଙ୍ଖ ଧ୍ୱନି

    ଘଣ୍ଟ ସଞ୍ଜେ ଦେବାଳୟେ

ଶୀଘ୍ର କର୍ମ ସାରି  ବିହଙ୍ଗ ଫେରଇ

     ଶ୍ରମିକ ଫେରେ ନୀଳୟେ ll

ବୃଦ୍ଧ ବୃଦ୍ଧା ନର  ଥଣ୍ଡାରେ ଆତୁର 

     ନିଆଁ ପୁଆଁନ୍ତି ସଞ୍ଜରେ

 ଶୁଖିଲା ଖାଦ୍ୟର  କରନ୍ତି ଆଦର

      ସହି ଶୀତକୁ କଷ୍ଟରେ ll

ସଞ୍ଜରେ ଦାଣ୍ଡରେ ଖେଳନ୍ତି ପିଲାଏ

    କବାଡି କ୍ରିକେଟ୍ ଖେଳ

ଡ଼େଇଁକି ନାଚିକି ଶୀତକୁ ଛଡ଼ାନ୍ତି

     ବୁହାଇ ଦେହରୁ ଝାଳ ll

ବାଦାମ ବୁଟକୁ  ପାଟିରେ ପକାଇ

    ଖାଆନ୍ତି ଉଷୁମ ଭଜା 

ପଶମ ପୋଷାକେ ଶରୀର ଢାଙ୍କିକି

     ସଞ୍ଜରେ ନିଅନ୍ତି ମଜା ll