ଶୀତ

ଧରିତ୍ରୀ କୋଳକୁ ଆସିଅଛି ଶୀତ

ଅସରନ୍ତି ଖୁସି ନେଇ

କାର୍ତ୍ତିକ ବ୍ରତର ଧରମ କରମ

ପୁଣ୍ୟ ପବିତ୍ରତା ପାଇଁ ।

ଶୀତୁଆ ସକାଳେ ଘଣ୍ଟ କାହାଳୀରେ

ରାମ କୃଷ୍ଣ ଶବଦରେ

ଗଗନ ପବନ ମୁଖରିତ ଶାନ୍ତି

ଦିବ୍ୟସତ୍ତା ଚେତନାରେ ।

ଲହରୀ ଖେଳୁଛି ସୁନାର ଫସଲ

ଚାଷୀ ମୁଖେ ମହାନନ୍ଦ

ଅମଳ କରିବ ଗୋଟି ଗୋଟି କରି

ଅମୂଲ ମୂଲ ସମ୍ପଦ ।

ଭକତି ଚିତରେ ସମର୍ପିବ ନେଇ

 ମହାଲକ୍ଷ୍ମୀ ପଦପ୍ରାନ୍ତେ

ଧନଧାନ୍ୟ ବସ୍ତ୍ର ସୁଖ ଅଈଶ୍ୱର୍ଯ୍ୟ

ମାଗିବ ସଂସାର ହିତେ ।

ବାଡ଼ି ବଗିଚାରେ ଗେଣ୍ଡୁର ଆସର

ମାଆଙ୍କ ବନ୍ଦନା ପାଇଁ 

ଝୋଟି ଚିତା ସାଥେ ସଜ୍ଜିତ ହୋଇବ

ପ୍ରତି ଘର ଶୁଦ୍ଧ ହୋଇ ।

ଜାତି ଜାତି ଫଳ ପନିପରିବାରେ

ହସିଲାଣି ବସୁନ୍ଧରା

ନାନା ରଂଗୀ ଫୁଲ ପୁରି ତା'ର କୋଳ

ଲାଗୁଅଛି କେଡେ ତୋରା ।

ଦେଇଥାଏ ଶୀତ ଶରୀରକୁ କଷ୍ଟ

ମନେ ଭରିଥାଏ ଖୁସି

ପରବ ପର୍ବାଣୀ ଫୁଲ ଫଳ ସାଥେ

ଭେଟିଦିଏ ଶସ୍ୟରାଶି ।