Library
Profile
ଶେଷ ରଥ
ଶେଷ ରଥ
ଜୀବନର ଶେଷ କୋକେଇର ରଥ
ହରି ରାମ ନାମ ସତ୍ୟ
ଶରୀର ଜଡରେ ଆତ୍ମା ଅଦୃଶ୍ୟରେ
ମୃତ୍ୟୁ ଅଟେ ଧ୍ରୁବସତ୍ୟ l
ଧନ ଜନ ମୋହ କାମ ଲୋଭ କୋହ
ଜୀବନର ଆତ୍ମ ଗର୍ବ
ନିମିଷକ ମଧ୍ୟେ ଅଣଚାଶ ବହେ
ଅଂହକାର ହୁଏ ଖର୍ବ l
ଛଅ ଖଣ୍ଡ କାଠ ହୁଏ ଆବଶ୍ୟକ
ଶେଷ ଯାତ୍ରା ସଜ ରଥ
ଶେଷ ତୀର୍ଥସ୍ଥାନ ଭୂଇଁଯେ ଶ୍ମଶାନ
ଜୁଇ ମାତ୍ର ତିନି ହାତ l
ଘର ଜମିବାଡ଼ି ଐଶ୍ୱର୍ଯ୍ୟ ସମ୍ପତ୍ତି
ବୃଥା ପ୍ରେମ ଅହମିକା
ମାନ ସନମାନ କ୍ଷଣିକ ଆନନ୍ଦ
ଜୀବନର ପ୍ରହଳିକା l
ମଣିଷ ଜୀବନ ମାତ୍ର ଦୁଇଦିନ
ଏବେ ଅଛି ଏବେ ନାହିଁ
ଲଭିଲେ
ଜନମ ମୃତ୍ୟୁବି ଆସିବ
ହିଂସା ବାଦ କାହା ପାଇଁ l
ନେଲା ଅବା କିଏ ମୁଁ ଅବା ନ ନେବି
ହିସାବ କରୁଛି ନିତି
ସୁନ୍ଦର ଶରୀର ହେବ ନାରଖାର
ସମୟ ଯାଉଛି ବିତି l
ମାନ ଅପମାନ ସୌନ୍ଦର୍ଯ୍ୟ ଯୌବନ
ଜନ୍ମ ମୃତ୍ୟୁ କ୍ଷଣସ୍ଥାୟୀ
ଯଶ କୀର୍ତ୍ତି ମାନ ରୁହଯେ ଅକ୍ଷୁଣ୍ଣ
ସତ୍ୟ ଧର୍ମ ଚିରସ୍ଥାୟୀ l
ମୃତ୍ୟୁର ଦୁର୍ଗରେ ଛିଡା ହୋଇ ଦମ୍ଭେ
ମୋର ମୋର ରଡି କରେ
ମୋର ବାପା ଜେଜେ କିସ ନେଇ ଗଲେ
କଳନା ନକରି ପାରେ l
ରାମ ନାମ ସତ୍ୟ ହରି ନାମ ସତ୍ୟ
କୋକେଇ ସବାରୀ ସତ୍ୟ
ଅସୂୟା ଅଧୈର୍ଯ୍ୟ କାମ କ୍ରୋଧ ଈର୍ଷା
ସବୁ ମିଛ ମୃତ୍ୟୁ ସତ୍ୟ l
