ଶାଶ୍ୱତ ପ୍ରେମର ଅପୂର୍ବ ଭାବନା

ସ୍ୱୟଂବର ସ୍ଥଳେ ଶ୍ରୀରାମଚନ୍ଦ୍ରଙ୍କ

   ମୁଖକୁ ଦର୍ଶନ କରି

ଜାଣିଥିଲେ ମାତା ନୁହଁନ୍ତି ସାମାନ୍ୟ

  ଦିବ୍ୟସତ୍ତା ଦେହଧାରୀ

ସ୍ୱାମୀ ରୂପେ ତାଙ୍କୁ ବରଣ କରିଲେ

    ଶକତି ପରଖ କରି

ଅଗ୍ନି ସମ୍ମୁଖରେ ଆପଣାର କଲେ

   ହୃଦୟେ ପୀରତି ଭରି

ସ୍ୱାମୀଙ୍କ ସମ୍ମାନ ପ୍ରତିଜ୍ଞା ନିମିତ୍ତ

    ରାଜସୁଖ ଦୂର କରି

ପଞ୍ଚବଟି ବନେ ଜୀବନ କାଟିଲେ

   ପତିସେବା ହୃଦେ ବରି

ପତିଙ୍କର ରାଜଧର୍ମ ରକ୍ଷା ପାଇଁ

   ଗରଭେ ସନ୍ତାନ ଧରି

ଋଷି ଆଶ୍ରମରେ ନିବାସ କରିଲେ

  ସିଏ ତପସ୍ୱିନୀ ପରି

ହୃଦୟରେ ଥିଲା ଅଜସ୍ର ପୀରତି

   ମନେ ପତ୍ନୀଧର୍ମ ସ୍ମରି

ନିଜର ଜୀବନ ସମର୍ପି ଖୁସିରେ

  ସାଜିଲେ ଯଶସ୍ୱୀ ନାରୀ

ପ୍ରେମର ବାଟରେ ଅସୂୟା ଭାବକୁ

  ଦେଇଥିଲେ ମାଆ ହରି

ଶାଶ୍ୱତ ପ୍ରେମର ଅପୂର୍ବ ଭାବନା

  ସଂସାରେ ଯାଉଛି ଝରି