ସେହି ଦିନୁ

ତୁମେ ଆଖିରେ ଆଖିରେ କଥା ହେଉଥିଲ ଯେଉଁ ଦିନୁ,

ଚେତି ଚାହିଁଲା ପୀରତି ଛାତିରେ ଛାତିରେ ସେହି ଦିନୁ ।

ତୁମେ କତିରେ କତିରେ ବସୁଥିଲ ଯେବେ ଘସି ହୋଇ,

ମାରି ପୀରତି କଟାରି ଛାତିରେ ଛାତିରେ ସେହି ଦିନୁ ।

ତୁମ ନିଃଶ୍ବାସ ପବନ ଉଷୁମ ଉଷୁମ ଛୁଆଁ ଛୁଇଁ,

ମତୁଆଲା ନିଶା ଜାଳେ ଛାତିରେ ଛାତିରେ ସେହି ଦିନୁ ।

କହୁଥିଲ କଥା ତୁନି ତୁନି କାନ ପାଶେ ଓଠ ଛୁଇଁ,

ନେସି ଦେଇ କେତେ ନିଶା ଛାତିରେ ଛାତିରେ ସେହି ଦିନୁ ।

ଗଲା ଫଗୁଣ ଫେରିଲା ତୁମରି ବାଟକୁ ଚାହିଁ ଚାହିଁ,

ବିରହ ରାଗ ବିଳାପେ ଛାତିରେ ଛାତିରେ ସେହି ଦିନୁ ।

ଅତି ସରାଗରେ ଆସି ଆଖି ପତାକୁ ମୋ ଛୁଇଁ ଛୁଇଁ,

ଫେରିଯାଏ ନିଦ ନିତି ରାତିରେ ରାତିରେ ସେହି ଦିନୁ ।

ଆସ ବାନ୍ଧି ହୋଇଯିବା ପ୍ରେମର ନିବିଡ଼ ବନ୍ଧନରେ,

ମୃଦୁ ତୃପ୍ତି ପ୍ରୀତି ଥାପି ଛାତିରେ ଛାତିରେ ସେହି ଦିନୁ ।

ମୁଁ ଗୋ ବାମନ ତୁମେ ମୋ ଆଶା ଆକାଶର ଚନ୍ଦ୍ରକଳା,

ଛୁଇଁ ଦେଖିବାର ଆଶା ଛାତିରେ ଛାତିରେ ସେହି ଦିନୁ ।