ସବୁଜୀକରଣ

ଗ୍ଲୋବ ଅଟଇ ନମୁନା ପୃଥିବୀ

ଦେଖିବାକୁ ଗୋଲାକାର

ଉପରେ ଜୀବନ ଭୂମିରୂପ ତାର

ଭିତରଟା ଶିଳାସ୍ତର ll

ପୃଥିବୀ ପୃଷ୍ଠର ଭୂମିରୂପ ସବୁ

ସମୁଦ୍ର ପାହାଡ଼ ଭୂମି 

ଝରଣା ଜଙ୍ଗଲ ନଦୀ ମାଳଭୂମି

ବୃକ୍ଷ ଲତା ବଣ ଭୂଇଁ ll

ତିନିଭାଗ ଜଳ ଏକ ଭାଗ ସ୍ଥଳ

ଧାରଣ କରିଛି ମହୀ

ସମୁଦ୍ର ବରଫ ହ୍ରଦ ନଦୀ ନାଳ

ଜଳରେ ରହିଛି ପୁରି ll

ସବୁଜ ବନାନୀ ଧାରଣ ଶରୀର

ପ୍ରତିଛବି ପୃଥିବୀର

ଜୀବ ଜନ୍ତୁ ବାସ ଧରିତ୍ରୀ ଉପରେ

କରନ୍ତି ନାନା ଜାତିର ll

ବୃକ୍ଷକୁ ହାଣିକି ଜଙ୍ଗଲ ଧ୍ୱଂସରେ

ମଣିଷର ମନ୍ଦବୁଦ୍ଧି

ସବୁଜ କୋଠରୀ ପ୍ରଭାବେ ପୃଥିବୀ

ତାପମାତ୍ରା ହୁଏ ବୃଦ୍ଧି ll

ଗଛ ଲତା ପ୍ରାଣ ପୃଥିବୀ ପୃଷ୍ଠର

କରନା ତାର ଛେଦନ

ଜୀବ ଜନ୍ତୁ ବାସ ଖାଦ୍ୟର ଭଣ୍ଡାର

ଧରିତ୍ରୀ ଶୋଭା ବର୍ଦ୍ଧନ ll

ଓଜନ ସ୍ତରର କ୍ଷୟରେ ପୃଥିବୀ

ସୂର୍ଯ୍ୟଙ୍କର ତେଜ ଘୋର

ବଂଚିବା ରହିବା ସମ୍ଭବ ନୁହଇଁ

ଜଳବାୟୁ ଭୟଙ୍କର ll

ବୃକ୍ଷ ଲତା ହୀନ ପୃଥିବୀ କାନ୍ଦୁଛି

ଶ୍ରୀହୀନ ତାର ଶରୀର

ଜୀବ ଜନ୍ତୁ ସବୁ ବିଲୁପ୍ତ ହେଲାଣି

ବାରେ ଟିକେ ଚିନ୍ତାକର ll

ଅମ୍ଳଜାନ ବିନା ମଣିଷ ମରୁଛି

ଭୋଗି ନାନା ରୋଗ ଦୁଃଖ

ସବୁର କାରଣ ଜଙ୍ଗଲ କ୍ଷୟ ତ

ନ ମିଳେ ସଂସାରେ ସୁଖ ll

ସଚେତନ ହୁଅ ମାନବ ଏବେଠୁ

ଜଙ୍ଗଲ ସୁରକ୍ଷା କର

ବନ୍ୟ ସଂରକ୍ଷଣ ଏକାନ୍ତ ଜରୁରୀ

ନିୟମ କଠୋର କର ll

ଗଛ ତ ଜୀବନ ସମାଜ ପାଇଁ କି

ବୃକ୍ଷ ଚାରା ଲଗାଇବା

ବୃକ୍ଷ ର ଯତନ ସଭିଏଁ କରିକି

ଜୀବନ ରକ୍ଷା କରିବା ll

ସବୁଜୀକରଣ କରିବା ପୃଥିବୀ

ସୁନ୍ଦର ବନାନୀ ଗଢି

ଗଛ ଲଗାଇଲେ ଜୀବନ ବଂଚିବ

ଲୋକେ ସଚେତନ କରି ll