ସାଥୀ

ସନେଟ-

ତୁମ ସାଥେ କଟିଥିଲା କେତେ ଦିନ ରାତି

ବାଟ ଚାଲୁଥିଲି ସାଥୀ ନ'ଥିଲା ମୋ" ଭୀତି ।

ଗାଉଥିଲି ତୁମ ସାଥେ ସୁମଧୁର ଗୀତି

ଯାହା ଆଜି ରହିଗଲା ମନେ ହୋଇ ସ୍ମୃତି ।।

ଉଙ୍କିମାରେ କୁଆଁତାରା ପାହିଯାଏ ରାତି

ବଗିଚାରେ ଫୁଲ ଫୁଟେ ଉଡେ ପ୍ରଜାପତି ।

ଡେଣା ଝାଡ଼ି ଝାଡ଼ି ପୁଣି ଉଡିଯାଏ ପକ୍ଷୀ

ଅମା ରାତି ମାଡ଼ିଆସେ ଲାଗିଯାଏ ଆଖି ।।

ତୁମେ କିନ୍ତୁ ଫେରିବନି ଆଉ କେବେ ଦିନେ

ପାହାନ୍ତା ପ୍ରହର ଅବା ଗୋଧୂଳି ଲଗନେ ।

ଏବେ ବି' ଲହଡି ଭାଙ୍ଗେ ଦେହେ ଯଉବନ

ଖୋଜିଲେ ଫେରେକି ଆଉ ସେ'ହଜିଲା ଦିନ।।

ହଜିଲା ଅତୀତ କୁହ କିଏ ସେ' ପାଇଛି

ତଥାପି ତୁମକୁ କାହିଁ ନିତି ମୁଁ" ଝୁରୁଛି ।