ଲାଇବ୍ରେରୀ
ପ୍ରୋଫାଇଲ୍
ସାଙ୍ଗ ସୁଖ
ସାଙ୍ଗ ସୁଖ
ଚଢେଇ କହିଲା ଗାଇବି କାହିଁକି
କିଏ ଶୁଣିବରେ ମିତ
ମୁଁ କହିଲି ମୁଉଁ ଶୁଣୁଛି ଶୁଣିବି
ଗାଇଦେ' ତୁ ତୋର ଗୀତ ।।
ତଟିନୀ କହିଲା ବହିବି କାହିଁକି
କିଏ କହୁଛିକି ମୋତେ
ବହୁଛୁ ବହିଯା' ସାଙ୍ଗ ମୋର ଆରେ
କହୁଛି ମୁଁ ପରା ତୋତେ ।।
ପାଦପ କହିଲା ଧରିବି କାହିଁକି
କିଏ ଖାଇବ ମୋ ଫଳ
ମୁଁ କହିଲି ମୁଉଁ ଖାଇବିରେ ତୋଳି
ଖାଇଲେ ବଢିବ ବଳ ।।
କୁସୁମ କହିଲା ଫୁଟିବି କାହିଁକି
କିଏ ନେବ ମୋତେ ତୋଳି
ମୁଁ କହିଲି ମୁଉଁ ଆସି ନେବି ତୋତେ
ନିଇତି ସକାଳଓଳି ।।
ସୂରୁଯ କହିଲା କିଏ ଖୋଜେ ମୋତେ
କାହିଁକି ଆସିବି ଉଇଁ
ମୁଁ କହିଲି ମୁଉଁ ବସିଛିରେ ଚାହିଁ
ଆସି ମୋତେ ଯାଆ ଛୁଇଁ ।।
ସାଗର କହିଲା କିବା ଲାଭ କୂଳେ
କାହିଁକି ପିଟିବି ମଥା
ମୁଁ କହିଲି ମୁଉଁ ଅଛି ପରା ସାଙ୍ଗ
ହେବି ତୋ ସାଥିରେ କଥା ।।
ଆକାଶ କହିଲା କାହିଁକି ଆସିବି
ସାତରଙ୍ଗ ନେଇକରି
ମୁଁ କହିଲି ମୁଉଁ ଦେଖିବି ସେସବୁ
ଆନନ୍ଦରେ ମନଭରି ।।
ସାଙ୍ଗ ବୋଲି ମନ ସାଙ୍ଗମାନଙ୍କର
ପାରିଲି ସିନା ମୁଁ ଜାଣି
ସାଙ୍ଗ ସୁଖ ପରା ସବୁ ସୁଖ ମୋତେ
ଆପେ ଦେଇଥାଏ ଆଣି ।।
