Library
ସାନ ହେବ ମହାନ
ସାନ ହେବ ମହାନ
ଇଟାଗଦା ଦିନେ
ଅଟ୍ଟାଳିକା ହେବ
କୀଟ ହେବ ଦିନେ ଓଟ
କୁଟାଖିଅ ଦିନେ
କାଠଓରା ହେବ
ସମୟର ସବୁ ନାଟ ।
ଶୃଗାଳ ଶାବକ
ସିଂହ ହୋଇଯିବ
ବୁଟଦାନା ହେବ ନଟୁ
କରାଟଟା ଦିନେ
ପାନବଟା ହେବ
ଚାମୁଚି ହୋଇବ ଚଟୁ ।
ସିଲଟଟା ଯେବେ
କଳାପଟା ହେବ
ପିନ୍ କଣ୍ଟା ହେବ ବାଡି
କମଳା ଲେମ୍ବୁଟା
କଖାରୁ ହୋଇବ
କରଣୀ ହୋଇବ କୋଡ଼ି ।
ମଲାଟଟା ଦିନେ
କବାଟ ହୋଇବ
ମଲ୍ଲୀଫୁଲ ହେବ କଇଁ
ଝାଇଁମାଛ ଯେବେ
କଇଁଛ ହୋଇବ
ପାନିଆ ସାଜିବ ମଇ ।
ପଟା ଲୁଗା ଦିନେ
ପାଟଶାଢ଼ୀ ହେବ
ବିଲେଇ ହୋଇବ ବାଘ
ଚିଲ କି ଶାଗୁଣା
ଈଗଲ୍ ହୋଇବେ
ବଣି ବି ହୋଇବ ବଗ ।
ବାଲି ଦୁମ ଦିନେ
ମାଲୁଦ ହୋଇବ
ମନରେ ଉଦ୍ ଯୋଗ ଥିଲେ
ନିଷ୍ଠା ସାଧନାରେ
ଏକନିଷ୍ଠ ଚିତ୍ତେ
ଏକାଗ୍ରେ ଅଗ୍ରଣୀ ହେଲେ ।
ସାନ ହେବ ଦିନେ
ମହାନ ନାୟକ
ସାଧନାରେ ହେଲେ ବ୍ରତୀ
ପୂନେଇଁ ଚାନ୍ଦର
ସୁନେଲି ଯୋଛନା
ପୋଛିଦେବ ଅମାରାତି ।
ନକରି ସୋଚନା
ସଜବାଜ ହୁଅ
ଧୂଳି ଝାଡି ଉଠ ବୀର
ଜିତିବା ପାଇଁକି
ଜନମ ତୋହର
ଯୁଝିବାକୁ କିଆଁ ଡର ।
