ସ୍ୱାଧୀନ ଭାରତ
ସ୍ୱାଧୀନ ଭାରତ
ପୂଜ୍ୟ ମୋ ସ୍ୱାଧୀନ ଭାରତ ଜନନୀ,
ତୁମ ସ୍ବାଧୀନତା ପ୍ରାପ୍ତି ।
ଛୟସ୍ତରୀ ବର୍ଷ ପାଳୁଛୁ ମାତା ଗୋ,
ନ ରଖି ମନରେ ଭ୍ରାନ୍ତି ।।
କେତେ ବୀର କେତେ ସୁପୁତ୍ରସୁପୁତ୍ରୀ,
ଦେଇଛନ୍ତି ବଳିଦାନ ।
ଇଂରେଜ କବଳୁ ଆଣିଲେ ଶାସନ,
ରଖି ଆମ ସ୍ୱାଭିମାନ ।।
ଆମରି ଶାସନ ଆମେ କଲୁ ସିନା,
ହେଲୁ ଖଣ୍ଡ ବିଖଣ୍ଡିତ ।
ଚାହିଁଛୁ ମାତା ଗୋ କରି ପୂର୍ଣ୍ଣ ଆଶା,
ପୁଣି ଅଖଣ୍ଡ ଭାରତ ।।
ଦିଅ ମା ଆଶିଷ କରିବୁ ତୁମକୁ,
ଶ୍ରେଷ୍ଠ ସ୍ଥାନେ ଅଳଙ୍କୃତ ।
ବିଶ୍ଵଗୁରୁ ତୁମେ ପୁଣିଥରେ ହେବ,
ଭିକ୍ଷା ମାଗେ ତୁମ ସୁତ ।।
ସ୍ବାଧୀନତା ସିନା ପାଇଲୁ ମାତାଗୋ,
ପୂର୍ଣ୍ଣ ସ୍ବାଧୀନତା ନାହିଁ ।
ଶିକ୍ଷାଦୀକ୍ଷା ଆଉ ସଂସ୍କୃତି ସଂସ୍କାର,
ପାଶ୍ଚାତ୍ୟ ପଛେ ଗୋଡ଼ାଇ ।।
ଦିଅ ଆଶୀର୍ବାଦ ଦିଅ ମାଗୋ ଦମ୍ଭ,
ପୂର୍ଣ୍ଣ ଭାରତୀୟ ହେବୁ ।
ଆମ ସଂସ୍କୃତି ଓ ପରମ୍ପରା ସାଥେ,
ବିଶ୍ବରେ ବିଜୟୀ ହେବୁ ।।
ଗଢ଼ିଦେବୁ ଆମେ ସ୍ୱର୍ଗପରି ପୁଣି,
ଅଖଣ୍ଡ ଭାରତ ଆମ ।
ହେ ସିଂହ ବାହିନୀ ବୀର ପ୍ରସବିନୀ,
ବିଶ୍ୱ ଦେଖୁ ପରାକ୍ରମ ।।
ଦେଶରୁ ହଟିବ ଖୁଣ ଅତ୍ୟାଚାର,
ହଟିବ କୋକୁଆ ଭୟ ।
ଦେଖିବ ଜଗତ ହୋଇଣ ଚକିତ,
ଭାରତ ମାତାର ଜୟ ।।
ଆଉଥରେ ଦିଅ ସାହସ ଶକତି,
ହେବୁ ଆମେ ପରାକ୍ରମୀ ।
ଯୋଗ ଆୟୁର୍ବେଦ ଗୀତା ରାମାୟଣେ,
ବିଶ୍ୱ ହେବ ଅନୁଗାମୀ ।।
ଆଜି ଏ ଅମୃତ ମହୋତ୍ସବ ବର୍ଷ,
ହେଉ ପ୍ରେରଣାର ଉତ୍ସ ।
ସ୍ୱାବଲମ୍ବୀ ହେବ ସଂସ୍କୃତ ସମ୍ପନ୍ନ,
ନିଶ୍ଚେ ମୋ ଭାରତ ବର୍ଷ ।।