ରୂପସୀ

ଶୀତ ସକାଳର କଅଁଳ ଖରା ତୁ

   ମୋ ଖୁସି ଶ୍ରାବଣ ଧାରା 

ମଧୁର ବେଳାର ଅଲିଭା ଗାର ତୁ 

  ମୋ ହୃଦୟ କାନ୍ଥ ସାରା

ମନ ଆଇନାର ଛଇଳୀ ଛବି ତୁ 

   ରୂପସୀ ରୂପ ପସରା 

ଜୀବନ ନଇର  ଅଛିଣ୍ଡା ରେଖା ତୁ 

   ଅଳସୀ ମେଘ ଅସରା

କୁସୁମ ବନର ଫୁଲେଇ ଫୁଲ ତୁ 

   ହସ ତୋର ମଧୁଝରା 

ଦୂର ପାହାଡର ଚଇତୀ ବାଆ ତୁ 

  ସ୍ମୃତି ତୋର ଅପାସୋରା

ହୃଦୟ ସିନ୍ଧୁର ଚଗଲୀ ନଇ ତୁ 

   ଅଦିନ ଜଳ ଫୁଆରା 

ପରୀ ରାଇଜର ଅପସରୀଟେ ତୁ 

  ଭାବ ତୋ ପୁରା ନିଆରା

ପ୍ରେମ ସଂଗୀତର ଚିତ୍ରଗୀତିଟେ ତୁ 

  ସ୍ବର ତୋ ପୁରା ବେସୁରା 

ପାହାନ୍ତି ରାତିର ମିଠା ସପନ ତୁ 

  ମନ କିଣେ ତୋ ଇସାରା