ରୁଧିର ବେଉଷଣ

ଆସିଛି ଋତୁ ଶ୍ରାବଣ ମହ୍ଲାର 

ଝପା ଝପା ବର୍ଷାର ରୁମ୍ ଝୁମ୍ ସ୍ଵର

କାନନ କେଦାର ତୀର

ତଡାଗ ତଟିନୀ ନୀର

ପ୍ରଫୁଲ୍ଲିତ ଢ଼ଙ୍ଗେ ଝୁମୁଛନ୍ତି 

ଇନ୍ଦ୍ରଧନୁ ଆଙ୍କି ଅମ୍ବରେ ଏକାକାର ।

 ଦେଖିଲା ଆଜି ଏ ନେତ୍ର

ଭିନ୍ନ ଋତୁର କଷଣ ବର୍ଷଣ

ବାରମାସୀ ଭିନ୍ନ ଋତୁଚକ୍ର 

ଯେମିତି ବିଦ୍ଧ ଛାତି ଛତ୍ର

ଲୁହ ନୁହଁ ଲହୁ ପଡୁଛି ନିଗିଡି

ଅମ୍ବର ବି ଥମିଯିବ

ପବନ ବି ଅଟକିବ

ଦେଖି ରୁଧିର ବେଉଷଣ ।

ପୂବେଇ ପବନ ଆଣେ

 ବର୍ଷା ଝପାକୁ ଝପା 

ସନ୍ତ ସନ୍ତିଆ ରାସ୍ତା ଘାଟ

କାଦୁଅ ପିଚିପିଚି ମଖା

ଉଦା ଲୁଗା ଶୁଖେନା

ଖରାପାଗ ଯମା ମିଳେନା

ଅଳସୀ ସରସୀ ଭର୍ତ୍ତି

କୂଳ ଲଂଘି ଧାଏଁ ଆନମନା ।

ଏଠି ଭିନ୍ନ ଋତୁର ମହା ମହୋତ୍ସବ

କାନ୍ଦଣା ଲହରୀ ମଧ୍ୟେ

ଶୁଭିଯାଏ ଅଶାନ୍ତ ମନର

ବ୍ୟାକୁଳିତ ପରିଚୟ

ଟପ୍ ଟପ୍ ଝରିପଡ଼େ 

ତରଳ ଗରଳ ଲାଭା

ନାରୀ ମନ ବନରେ

ଖାଣ୍ଡବ ଦହନ ହୁଏ

ପ୍ରଶମିତ କେମିତି ହେବ ବିହ୍ନିପ୍ରଭା ।

କେବେ ଟୁପୁର୍ ଟାପୁର୍ ଶୁଭେ

ପତ୍ର ଗହଳେ

କେବେ ପଡ୍ ପଡ୍ ବର୍ଷିଯାଏ

ଲାଗେ ଅସମ୍ଭାଳେ

ପୁଣି କେବେ ମୂଷଳ ଧାରା

ଧରା ଧରଣୀ ଧରିତ୍ରୀ 

ପ୍ଳାବନ କରଇ ସସାଗରା ।

ଦୂର ପାହାଡ଼ଗଣ ମୁଣ୍ଡରେ ବର୍ଷେ

ଭସା ମେଘଙ୍କୁ କୂଳରେ ବସେ

ମୁଣ୍ଡରେ ଚଢି କରନ୍ତି ଗେଲ

ମୌନ ତପସ୍ଵୀ ପରି ଦିଶେ ସ୍ଥବିର

ସହନ୍ତି ବରଷା ଧାର 

ନ କରି ପ୍ରତ୍ୟୁତ୍ତର ।

ଋତୁ ବଦଳିବ ବର୍ଷା ସରିବ

ପ୍ରକୃତିର ନିୟମ

ଆଖିର ଋତୁ କେବେ ବଦଳିବ

ସମୟ ହିଁ ନିଷ୍କାମ ।