ଲାଇବ୍ରେରୀ
ପ୍ରୋଫାଇଲ୍
ରତ୍ନଗର୍ଭା ଓଡ଼ିଶା
ରତ୍ନଗର୍ଭା ଓଡ଼ିଶା
ଭାରତ ଭୂଖଣ୍ଡେ ଖଣିଜ ସମ୍ପଦ
ରହିଅଛି ପୁରି ଯେତେ
ଓଡ଼ିଶାରେ ତାର ତିନି ଚତୁର୍ଥାଂଶ
ଭରିଅଛି ନାନା ମତେ।
ମୟୁରଭଞ୍ଜ ଆଉ ସୁନ୍ଦରଗଡ଼
କେନ୍ଦୁଝର ଯାଜପୁର
ଖଣିରୁ ମିଳଇ ଲୁହାପଥରଟି
କେତେଯେ ଉଚ୍ଚ ମାନର।
ଓଡ଼ିଶାର କଳାହାଣ୍ଡି କୋରାପୁଟ
ରାୟଗଡ଼ା ବଲାଙ୍ଗୀର
ଖଣିରେ ରହିଛି ବକସାଇଟ ଯେ
ଅନେକ ପରିମାଣର।
ବକସାଇଟ ଉତ୍ପାଦନେ ଓଡ଼ିଶା
ଅଗ୍ରଣୀ ରାଜ୍ୟ ଅଟଇ
ଆଲୁମିନିୟମ ଯହିଁରୁ ପ୍ରସ୍ତୁତ
କରାଯାଇଥାଏ ଭାଇ।
ଉଡାଜାହାଜ ଓ ବାସନ କୁସନ
ତିଆରିରେ ବ୍ୟବହୃତ
ଓଡ଼ିଶାରେ ମିଳେ ସମଗ୍ର ଦେଶର
ପଇଁଚାଲିଶ ପ୍ରତିଶତ।
ସମ୍ବଲପୁର ଓ ସୁନ୍ଦରଗଡରେ
ମାଂଗାନିଜ ଖଣି ଭରା
କ୍ରୋମାଇଟ ଅଭ୍ର ସହିତ ଯାହାର
ମାଟିତଳୁ କଳାହୀରା।
ନଦ ନଦୀ ଭରା ସମତଳ ଭୂମି
ଅରଣ୍ୟ ସମ୍ପଦେ ଭରି
ମନ୍ଦିର ମାଳିନୀ ଉତ୍କଳ ମାତାର
ଶୋଭାକୁ ବର୍ଦ୍ଧନ କରି।
ଉପକୂଳ ରାଜ୍ୟ ପରିପୂର୍ଣ୍ଣ ହେତୁ
ସାଗର ଗର୍ଭରେ ରତ୍ନ
ବିଦେଶୀ କବଳୁ ରକ୍ଷା କରି ଆମେ
କରିବା ଖଣିର ଯତ୍ନ।
ଉତ୍କଳର ମାଟି ରହିଥାଏ ସଦା
ଖଣି ଖାଦାନରେ ଭରା
ସେଥିପାଇଁ ପରା ଓଡିଶାକୁ ଆମ
ରତ୍ନଗର୍ଭା ବୋଲେ ଧରା।
