ରକ୍ଷା ବନ୍ଧନ

ଗୋଟେ ଅଗଣାରେ ଖେଳୁଥିଲେ ଆମେ

ପିଲାଟି ଦିନରୁ କେତେ ।

ଲୁଚିଯାଉଥିଲୁ କବାଟ କଣରେ

ଖୋଜୁଥିଲି ମୁଁ ତତେ ।।

ଜନମ ଦିନରେ ହେଲେ ନୂଆ ଜାମା

ଖୁସିରେ ତୁ ନାଚି ଯାଉ ।

କାନ୍ଦି ଗଡ଼ିଯାଏ ଅଝଟିଆ ହୋଇ

ମତେ ବି ଆଣିଦେ ବଉ ।।

ଘରେ ମାଛ ଭଜା ହେଲେ କେବେ ଯଦି

ବଉ ମତେ ଦିଏ ଗୋଟେ ।

ତୁ କହୁ ରାଗରେ ତାଟିଆ କଚାଡି

ଖାଇବିନି ଆଜି ମୋଟେ ।।

ରାକ୍ଷୀ ବନ୍ଧନରେ ବାନ୍ଧିଲେ ତୁ ରାକ୍ଷୀ

ଖୋଇଦେଇ ମିଠାଟିଏ ।

ଗୋଡେଇ ଗୋଡେଇ ମତେ ଭିଡ଼ି ନେଇ

କହୁ ତୁ ପାଉଣା ଦିଏ ।।

ମୋ ଗେଲ୍ଲୀ ଭଉଣୀ ସୁନା ନାକି କହି

ମନାଏ ଚୁମ୍ବନ କରି ।

ବଡ଼ ହୋଇଗଲେ ତତେ ଆଣିଦେବି

ଶାଢ଼ୀ ପାଟ ଲଗା ଜରି ।।

କାଲି ଥିଲୁ ଆମ ଅତି ଆପଣାର

ଆଜି ହେଇ ଗଲୁ ପର ।

ସେନେହଁ ମମତା ଅଗଣାକୁ ଭୁଲି

ଚାଲିଗଲୁ ଶାଶୁଘର ।।

ବାନ୍ଧି ଗଲୁ ନାହିଁ ରାକ୍ଷୀ ମୋ ହାତରେ

ରକ୍ଷା କବଚ ଟେ ଦେଲୁ ।

ଘୃତ ଦୀପ ଆଉ ଫୁଲ ଚନ୍ଦନରେ

ମତେ ତୁ ବନ୍ଦାଣ କଲୁ ।।

ଭଉଣୀଲୋ ତୋର ରାକ୍ଷୀ ର ମହତ୍ଵ

ରଖିବି ସାରା ଜୀବନ ।

ଆସିବାକୁ କେବେ ଦେବି ନାହିଁ ମନେ

ଆଜୀବନ ବାଧା ବିଘ୍ନ ।।