ରଜଖାସି

ପ୍ରବଳ ଗ୍ରୀଷମ ଭାଇ ଟାଇଁ ଟାଇଁ ଖରା l

ଡିବି ଡିବି ଡିବି ଡିବି ବାଜିଲା ନାଗରା l

ଡେଙ୍ଗୁରା ବାଜୁଛି ପାଞ୍ଚ ଗ୍ରାମେ ଗିଡ଼ିଗିଡ଼ି l

ରଜ ମଉଜ ହୋଇବ ଖେଳିବା ବାଗୁଡ଼ି l

ବାଜି ରଖା ଅଛି ଏକ ହେଏଁ ବଡ଼ ଖାସି l

ଜିତା ପଟ ଦଳ ନେଇଯିବ ହୋଇ ଖୁସି l

ହଗୁରି, କାଁହ୍ନୁଆ, ମୂଷା ,ମଧୁ ଓ ଧଡ଼ିଆ l

ଟୋକା ସବୁ ଆସିଗଲେ କଇଥ ପଡ଼ିଆ l

ରଙ୍ଗସ, ପଥର ପଡ଼ା ଦୁଇ ଗୋଟି ଦଳ l

ଦୁଇଦଳ ମଧ୍ୟେ ଧୀରେ ଜମିଗଲା ଖେଳ l

"ବାଗୁଡୁ ଗୁଡ଼ୁ,ବାଗୁଡୁ ଗୁଡ଼ୁ, ବାହାଘର ଦିନ

ଜାଇ ରଗୁଡୁ,ଜାଇ ରଗୁଡୁ ବାଗୁଡ଼ୁ ବାଗୁଡ଼ୁ

ବାଇଁ ଚିରା,ବାଇଁ ଚିରା ଭାଈ କଳା ଜିରା l

କଳା ଜୀରା ଭାଈ ରାଆଗେନା ରାଆଗେନା,

ହାଣ୍ଡି କୁଣ୍ଢେଇ ଭାଆଙ୍ଗେନା ଭାଆଙ୍ଗେନା ।

ନାଗରା ବାଜୁଛି ଯେହ୍ନେ ରଣେ ବୀରବାଦ୍ୟ

ଖେଳ ଚାଲି ଅଛି ଯଥା କୁରୁକ୍ଷେତ୍ର ଯୁଦ୍ଧ l

ପଥର ପଡ଼ା ହଗୁରୀ, ରଙ୍ଗସର ମୂଷା

ଗଡ଼ାପଡ଼ା ଲାଗିଥାନ୍ତି ଯେହ୍ନେ ଭୀମ ଦୁଃଶା l

ଖେଳ ଜମିଥିଲା ମଧୁ ଲୁଙ୍ଗି ଖୋଲିଗଲା

ଚଢ଼ି ପିନ୍ଧି ଥିବାରୁ, ତା' ଇଜ୍ଜତ ବଞ୍ଚିଲା l

ଛକା ପଞ୍ଝା ଖେଳ ଶେଷେ ନାଗରା କହିଲା

ପଥର ପଡ଼ା ଜିତିଲା, ବାଜି ଖାସି ନେଲା l

ସଞ୍ଜବେଳେ ଟୋକାମାନେ ସବୁ ମିଳିମିଶି

ଭୋଜିଟିଏ କଲେ କାଟି ଜିତା ପଟ ଖାସି l

ରୋଷେଇ ଚାଲିଛି ସବୁ ମିଶିଗଲେ ସାଙ୍ଗ

ବାଟିକରି ପକାଇଲେ ଟେଳେ ଟେଳେ ଭାଙ୍ଗ l

ଟହଲିଆ ମୋତେ କଲେ ଦୁର୍ବଳିଆ ଦେଖି

ତିନିଦିନ ଶୋଇଲି ମୁଁ ଭାଙ୍ଗ ଟେଳେ ଚାଖି l