Library
Profile
ରାମରାଜ୍ୟ ଏବେ କାହାଣୀ
ରାମରାଜ୍ୟ ଏବେ କାହାଣୀ
ମାତା, ପିତା, ଗୁରୁ, ଜାଣିଲୁ ଜନ୍ମରୁ,
ତାପରେ ତ୍ରିନାଥ ଠାକୁର,
ତାପରେ ଜାଣିଲୁ, ମହାତ୍ମାଗାନ୍ଧୀ ଯେ,
ଜାତିର ଜନକ ଆମର ।
ଦେଶ ହିତେ ତାଙ୍କ କର୍ତ୍ତବ୍ୟର ଗାଥା,
ପଢି, ଶୁଣି ହୋଇ ଗର୍ବିତ,
ତାଙ୍କ ପାଦ ଚିହ୍ନେ, ପାଦ ମିଳେଇ କି,
ଗଢ଼ିବାକୁ ନୂଆ ଭାରତ ।
କେତେ ଯେ ଶପଥ, ନିଅନ୍ତି ବାଳୁତ,
ଦେଖି ସେ ଫକୀର ବୁଢାକୁ ।
ମନ ଦୁଃଖେ ଦେଖି, ଜାତିର ପିତାଙ୍କ,
ଅଭାବ,ଅନଟ ବେଶକୁ,
ପେଟ ଲୁଚିଛି ନା, ଆଣ୍ଠୁ ବି ଲୁଚୁଛି,
ଦୁଇ ଖଣ୍ଡ ଖଦି ଲୁଗାରେ,
ଚମ ଧଡ ଧଡ,
ଥନ୍ତଲା ପେଟରେ,
ବାଡି ଖଣ୍ଡେ ଧରି ଆଗରେ ।
ନିଷ୍କପଟ ଏହି, ଭାରତବାସୀଙ୍କୁ,
କପଟୀ ଇଂରେଜ ବେପାରୀ,
ପରାଧୀନତାର ଶୃଖଳେ ବାନ୍ଧିଲେ,
ଭାଇ ଭାଇ କରି ବଇରୀ ।
ଅହିଂସାର ଅସ୍ତ୍ର କେତେ ଯେ ଶକତ,
ଦେଖେଇଲ ବାପୁ ବିଶ୍ବକୁ,
ବିନା ରକ୍ତପାତେ, ସେହି ଅସ୍ତ୍ରେ ଯୁଦ୍ଧ,
ସ୍ବାଧୀନତା ଦେଲା ଆମକୁ ।
ପଢ଼ି ଶୁଣି ମୁହିଁ ଏ କଥା ଜାଣିକି
ସେ ଦିନୁ କରୁଛି ମୁଖସ୍ଥ,
ତା ପର କାହାଣୀ, ରାମରାଜ୍ୟ କଥା,
ସ୍ବପ୍ନରେ ସୁନାର ଭାରତ ।
ଜୟ ଜଗନ୍ନାଥ ସ୍ବାମୀ
