Library
ରାକ୍ଷୀ କହେ ହସି ହସି
ରାକ୍ଷୀ କହେ ହସି ହସି
ରାକ୍ଷୀ କହେ ହସି ହସି
ଭଉଣୀମାନେ ମୋତେ କିଣି ନିଅ ଆସି
ଦେଖ ସଜାଇ ହୋଇଛି ମୁଁ କେତେ
ଦିଶେ ମୁଁ ମନୋହର ସଜ ଗୋଲାପ ପରି
ଦୃଷ୍ଟି ତୁମର ଆଣିବି ଚୋରୀ କରି
ବୁଝେନା କିଛି ଅଭାବ ତେଲ ଲୁଣ ସଂସାରର
କି ମହଙ୍ଗା ବଜାରର ଅଭାବୀ ବିକ୍ରୀ ଦର
ଚମକରେ ମୋର ଚମକେଇବାକୁ ଚାହେଁ
ମୋ ପରି ସବୁ ଭାଇ ଭଉଣୀମାନଙ୍କୁ
ବାନ୍ଧି ଦେଇ ମୋର ଏ ଦୃଢ଼ ଭାବର ଡୋର
ରାକ୍ଷୀ କହେ ହସି ହସି ।
ମୁଁ ବୁଝେ ଭଉଣୀମାନଙ୍କର ମନର କଥା
ସଜେଇ ହେବାକୁ ଚାହାଁନ୍ତି ମୋ ପରି
ସେମାନେ ପ୍ରତି ପରିବାରରେ
ଘର ଆଗ ଅଚାଣାର ସୁନ୍ଦର ଫୁଲଝରି
ଖୋଜନ୍ତି ଭାଇର ସ୍ନେହ ଶ୍ରଦ୍ଧା ଟିକକ
ଆଖିରେ ଅସୁମାରି ସପନ ଭରି
ମୋ ଚେହେରାର ଭାବ ଭାବନା ମିଶାଇ
ସଂପର୍କକୁ ରଖିବେ ଅମୃତମୟ କରି
ରାକ୍ଷୀ କହେ ହସି ହସି ।
ଗୋଟିଏ ଦିନ ପାଇଁ ମୋର ଏ ଜୀବନ
ଚାହେଁନା ଦେଖିବାକୁ କା' ଆଖିରେ ଲୁହ
ଇଚ୍ଛା ମୋର କେବଳ ମାତ୍ର
ଦେଖିବାକୁ ଭାଇ ଭଉଣୀର ଅତୁଟ ବନ୍ଧନ
କିଏ ଜାଣେ ତୁମେ ନା ମୁଁ
ହୁଏତ କାଲିକୁ ଏ ଆନନ୍ଦ ଉତ୍ସାହ ନଥିବ
ମନରୁ ପ୍ରାଣରୁ ହୃଦୟରୁ
ବାଲିଘର ପରି ଧୋଇ ହୋଇ ଯାଇଥିବ
ରାକ୍ଷୀ କହେ ହସି ହସି ।
ମନରୁ ମାନ ଅଭିମାନ ରାଗ ରୋଷ
ଏବେରୁ ଭୁଲିଯାଅ ଭୁଲିଯାଅ
ଶ୍ରାବଣର ବର୍ଷା ଝର ପରି ଝରି ଝରି
ବହିଯିବ କୁଆଡ଼େ ସମୟର ପାଣି ସୁଅ
ଭଉଣୀମାନେ ଆସ ଆସ
ମୋତେ ତୁମ ମନ ପସନ୍ଦରେ କିଣି ନିଅ
ଶୁଭ ମନାସି ଭାଇ ହାତରେ ବାନ୍ଧି ଦିଅ
ପ୍ରଭୁ ଜଗନ୍ନାଥ ସୁଭଦ୍ରାଙ୍କ ପରି ହୋଇ ଯାଅ
ରାକ୍ଷୀ କହେ ହସି ହସି ।
