ପୁଣ୍ୟ ମାର୍ଗଶୀର

ମାସଙ୍କ ମଧ୍ୟେ ଅଟେ ସାର l

     ହିମ କାକର ମାର୍ଗଶୀର ll

ମୁଁ ଅଟେ ଶ୍ରେଷ୍ଠ ମାର୍ଗଶୀର୍ଷ l

    କହିଲେ ପ୍ରଭୋ ଜଗଦୀଶ ll

ସର୍ଷପ କୁସୁମେ କେଦାର l

    ଶୋଭା ତା ଜନମନ ହର ll

ସଜ ହେଲେଣି ସିନ୍ଧୁ ଜେମା l

    ମର୍ତ୍ତ୍ୟେ କରିବେ ପରିକ୍ରମା ll

ଆକାଶେ ଉଦେ ଦିବ୍ୟତାରା l

     ନାମ ତାହାର ମୃଗଶୀରା ll

ଧିରେ ଆସୁଛି ମାଡ଼ି ଶୀତ l

     ସଜାଇ ରଖ ଶୀତ ବସ୍ତ୍ର ll

ଶିଶିର ନାଶିଲା ପଦ୍ମିନୀ l

   ଫୁଟିଲେ ଧୀରେ କମଳିନୀ ll

ପୂଜା ହୋଇଲେ ପଦ୍ମାଳୟା l

    ମାଣ ବସାରେ ବିଷ୍ଣୁଜାୟା ll

ଶ୍ରୀଲକ୍ଷ୍ମୀ ପୁରାଣ ଗାୟନ l

     ଗାଆନ୍ତି ଭକ୍ତ ବଳରାମ ll

ଜଗା ବଳିଆ ଦୁଇ ଭାଇ l

   ଲକ୍ଷ୍ମୀଙ୍କୁ ଦେଲେ ଘଉଡ଼ାଇ ll

ଲକ୍ଷ୍ମୀ ତାହାଙ୍କୁ ଗଲେ ଛାଡ଼ି l

    ନ ମିଳେ ଭିକ୍ଷା ଅନ୍ନ ପଡ଼ି ll

ନାରୀ ଜାତିର ରଖି ମାନ l

     ଲକ୍ଷ୍ମୀଙ୍କୁ ଘେନି ଭଗଵାନ ll

ଶ୍ରୀମନ୍ଦିରରେ ସ୍ଥାନ ଦେଲେ l

   ମନ୍ଦିରଶ୍ରୀ ମା' ବୋଲାଇଲେ ll

ପୁଣ୍ୟ ଏ ମାସ ମାର୍ଗଶୀର l

     କେଶବ ନାମ ବିଷ୍ଣୁଙ୍କର ll

ବିଷ୍ଣୁ ପ୍ରିୟାଙ୍କ ମାସ ଏହି l

    ଧନ ଧାନ୍ୟରେ ପୂର୍ଣ୍ଣ ମହୀ ll

ପକ୍ବ ଧାନ୍ୟକୁ ଅବଲୋକି l

     କୃଷକେ ହେଉଛନ୍ତି ସୁଖି ll

ହୋଇଲା ମାର୍ଗଶୀର୍ଷ ଶେଷ l

    ମହୀରେ ବିଜେ ପୁଷ ମାସ ll

ଧନ୍ୟ ଏ ୠତୁ ଆବର୍ତ୍ତନ l

       ସୃଜି ଅଛନ୍ତି ଭଗଵାନ ll

ଧନ୍ୟ ହେ ବିଶ୍ୱ କାରିଗର l

     ଘେନ ମୋହର ନମସ୍କାର ll