ପତି ପରମେଶ୍ବର
ପତି ପରମେଶ୍ବର
ନାଲି ଶଙ୍ଖାଚୂଡି ପାଦରେ ଅଳତା
ମଥାରେ ଟୋପେ ସିନ୍ଦୂର
ଅର୍ଦ୍ଧାଙ୍ଗିନୀ ପତ୍ନୀ ଧର୍ମ ପତିପ୍ରାଣା
ପତି ହିଁ ପରମେଶ୍ୱର ।
କାୟମନୋବାକ୍ୟେ ସ୍ୱ।ମୀ ସୁହାଗିନୀ
ଗ୍ରହୀତା ପାଣି ବିଶ୍ୱାସେ
ନିଭାଏ ସମ୍ବନ୍ଧ ପତ୍ନୀ ଶ୍ୱଶୁରାଳେ
ତ୍ୟାଗେ ନିଃଶ୍ୱାସକୁ ଶେଷେ ।
ସଂସାରର ଘନ ବନ୍ଧୁର ପଥରେ
ମିଶାଇ ପାଦକୁ ପାଦ
ସହଚରୀ ପତ୍ନୀ ସୃଜନେ ପାଳନେ
ପତିଙ୍କୁ ଦିଏ ଆହ୍ଲାଦ ।
ଆସୁ ଝଡ଼ ଝଞ୍ଜା ସୁଖ ଅବା ଦୁଃଖ
ହସାଏ ସୁନା ସଂସାର
ଜୀବନ ଦାୟିନୀ ନଦୀ ସମ ପତ୍ନୀ
ଏକାକାରେ କୁଳୋଜ୍ଜ୍ୱଳ ।
ଶୟନେ ସ୍ୱପନେ ଅବା ଜାଗରଣେ
ଜୀବନର ପ୍ରତିକ୍ଷଣ
ପତି ପରାୟଣେ ଭୁଲି ଆପଣାକୁ
ବିତରେ ସେନେହ ପ୍ରେମ ।
ସେବା ସମର୍ପଣ ପବିତ୍ର ନିଷ୍ଠାରେ
ଶବ ବି ପାଲଟେ ଶିବ
କାଷ୍ଠ ଓ ପାଷାଣେ ପରମେଶ୍ବର ବି
ମୂର୍ତ୍ତିମନ୍ତ ଆବିର୍ଭାବ ।
ସତୀ ସୁଚରିତା ନାରୀ ପୂଜନୀୟା
ମହାଶକ୍ତି ମୂଳାଧାର
ତା ମଥା ସିନ୍ଦୂର ଚମକେ ଉଜ୍ଜ୍ବଳ
ସ୍ୱର୍ଗ ମର୍ତ୍ତ୍ୟ ତିନି ପୁର ।
ମୋ ପୁଣ୍ୟ ଭୂମିରେ ସୀତା ଓ ସାବିତ୍ରୀ
ପବିତ୍ରତା ସୂଚିବ୍ରତେ
ଆଦର୍ଶ ସଂସ୍କାରେ ନାରାୟଣ ନର
ନାରୀ ସର୍ବତ୍ର ପୂଜ୍ୟତେ ।
---+++---