ପ୍ରଥମ ଚିଠି
ପ୍ରଥମ ଚିଠି
ଶ୍ରୀଜଗନ୍ନାଥଙ୍କୁ ସୁମରଣା କରି
ଲେଖୁଛି ପ୍ରଥମ ଚିଠି ।
ମନେପଡ ପ୍ରିୟା ଦେଖୁଛି ଗୋଲାପ
ଊପବନେ ଅଛି ଫୁଟି ।୧।
ଆହା କି ସୁନ୍ଦର ଦିଶୁଛି ସୁବାସ
ମହକି ଆସୁଛି ତାର ।
ମନେପଡ ଆଜି ବସି ମୁଁ ଭାବୁଛି
ସୁନ୍ଦର ସ୍ମୃତି ତୁମର ।୨।
ଦୂରେ ସିନା ଅଛ ଭାବିବନି କେବେ
ଦୂରରେ ରହିଛ ବୋଲି ।
ଅତି ନିକଟରେ ଅଛ ବୋଲି ମୋର
ଭାବିବ କହୁଛି ଖୋଲି ।୩।
ଚନ୍ଦ୍ର ଚକୋରଙ୍କ ପୀରତିକୁ ଟିକେ
ହେତୁକର ମନେ ମନେ ।
କୁମୁଦ କୁମୁଦିନୀ ଦୁହିଁଙ୍କ ପ୍ରୀତି
ଊଣା କି ହୋଇବ ଦିନେ ? ୪।
ଘନ ବରଷିବ ଚାତକ ଚାହିଁଛି
ଏକଥା ମନରେ ଧର ।
ଯେତେ ଦୂରେ ଆମେ ରହିଥିଲେ ହେଲେ
ପୀରତି ଆମ ମଧୁର ।୫।
ବରଷାର ବାରି ଧାରା ବରଷିଲେ
ନ ପଡିବ କି ଧରାରେ ?
ଯାହା ମୁଁ ଲେଖୁଛି ମୋ କଥା ଟିକିଏ
ହେଜିବ ତୁମ ମନରେ ।୬।
ଚନ୍ଦ୍ରମା ଦର୍ଶନେ ତୁମେ ଆସ ମନେ
ମୀନ କି ଜୀବନ ବିନା ।
ରହି କି ପାରିବ କହିବ ଟିକିଏ
ସେପରି ମୁଁ ତୁମ ବିନା ।୭।
କେବେ ତ ଲେଖିନି ଚିଠି ମୁଁ ତୁମକୁ
ଏଇ ମୋ ପ୍ରଥମ ଚିଠି ।
ପ୍ରଭୁଙ୍କୁ ସୁମରି ଦିନ ମୁଁ ଗଣୁଛି
କେବେ ହୋଇବା ଏକାଠି ।୮।