ପ୍ରିୟତମ

   

ତୁମ ପ୍ରେମର ପବିତ୍ର ପୀୟୂଷ ଦାନ କରି 

     ମଧୁର ବନ୍ଧନେ ବାନ୍ଧିଛ ମୋ ଜୀବନ ତରୀ 

ପ୍ରିୟରୁ ହୋଇଛ ତୁମେ ମୋର ପ୍ରିୟତମ 

       ସୁଖ ଶାନ୍ତି ତୃପ୍ତି ଦିଅ ମୋତେ ଅନୁପମ 

ଅଦୃଶ୍ୟ ଭାବନାରେ ଥିଲା ଯା' ଭାବାନ୍ତର 

   ମୋର ସେ ଆଶା ସ୍ବପ୍ନକୁ କଲ ତୁମେ ସାକାର 

ସ୍ଵାମୀ ରୂପେ ପାଇ ତୁମକୁ ହୋଇଛି ଧନ୍ୟା 

       ତୁମ ପାଇଁ ମୁଁ ହୋଇଛି ସ୍ଵୟଂ ସଂପୂର୍ଣ୍ଣା 

ଥିଲା ଯେତେ ମୋ ମନ ଗହନରେ କଳ୍ପନା 

     ସତ କଲ ତୁମେ ପୂର୍ଣ୍ଣହେଲା ମନସ୍କାମନା 

ତୁମେ ମୋ ଆଖିର ଅଞ୍ଜନ କର ମନୋଞ୍ଜନ 

      କଲେ ମାନ ଅଭିମାନ କର ମାନ ଭଞ୍ଜନ

ମୋ ଜୀବନ ରଥର ତୁମେ ଗୋ ସାରଥି 

     ତୁମ ପାଇଁ ପାଳେ ବାର ବ୍ରତର ପୁଣ୍ୟ ତିଥି 

ତୁମେ ଶାନ୍ତ ନମ୍ର ଭଦ୍ର ସରଳ ଉଦାର 

     ମନ ତୁମର ସ୍ବଚ୍ଛ ସୁନ୍ଦର ନିର୍ମଳ ନିର୍ବିକାର 

ତୁମେ ଯଶସ୍ଵୀ ସାଧୁ ସଚ୍ଚୋଟ ସୁପୁରୁଷ 

      ମୋ ହୃଦୟରୁ ଘୁଞ୍ଚାଇ ଦିଅ ଦୁଃଖ କ୍ଳେଶ 

ତୁମ ସାନିଧ୍ୟରେ ତୁମକୁ କରିଛି ମୋ ଆରାଧ୍ୟ 

      ନାରୀ ଧର୍ମ ନିଭାଇବା ହୁଏ ସହଜ ସାଧ୍ୟ 

ହୃଦୟ ମନ୍ଦିରରେ ରଖି ତୁମକୁ କରେ ପୂଜା 

      ତୁମ ଲାଗି ମାତୃତ୍ୱର ଉଡ଼େ ସୁନାମ ଧ୍ଵଜା 

ମୋତେ ରାଣୀ କରି ହୋଇଛ ତୁମେ ରାଜା 

     ସୁଗମ ରହୁ ଚଲାପଥ ନ ହେଉଁ ଦିଗହଜା 

ଘର ସଂସାର ସଜାଡ଼ିବାକୁ ଦିଅ ସୁଯୋଗ 

   ସୁଖ ଆସୁ ଝରୁ ଲହୁ ପାଏ ମୁଁ ତୁମ ଅନୁରାଗ 

ମୋ ଅଧରରେ ଭରି ଦିଅ ତୁମେ ମଧୁର ହସ 

     ହୃଦୟଭରା ଭଲ ପାଇବାର ପାଏ ସୁବାସ  

ମୋ ଇଚ୍ଛାକୁ ଦେଇ ସମ୍ମାନ କର ପୂରଣ 

      ମାର୍ଜିତ ରୁରିପୂର୍ଣ୍ଣ ତୁମ ଆଚରଣ ଉଚ୍ଚାରଣ 

କେଉଁ ଜନ୍ମର ପ୍ରାରବ୍ଧରେ ହୋଇଛି ତୁମ ସ୍ତ୍ରୀ 

    ତୁମ ପାଇଁ ସୌଭାଗ୍ୟବତୀ ବଢ଼େ ମୋ ଶିରୀ 

ଶୁଭ ମନାସି କରେ ମହାପ୍ରଭୁଙ୍କୁ ମୁଁ ପ୍ରାର୍ଥନା 

    ଅଇସୁଲକ୍ଷଣୀ ହେବାକୁ କରେ ପୂଜା ଅର୍ଚ୍ଚନା 

ହେ ମୋର ପ୍ରିୟତମ ତୁମେ ରୁହ ସଦା ଉତ୍ତମ 

    ମନ ପ୍ରାଣ ହୃଦୟେ ପାଳୁଥାଅ ନ୍ୟାୟ ଧରମ 

ରୁହ ସଦା ସୁସ୍ଥ ସବଳ ନିରୋଗ ନିରାମୟ 

    ଆମ ସୁନାର ଘର ସଂସାର ହେଉ ମଧୁମୟ 

ପ୍ରତି ଜନ୍ମରେ ତୁମେ ହେବ ମୋ ସ୍ଵାମୀଦେବ 

    ତୁମକୁ ପାଇଲେ ପାଇବି ସବୁ ପାର୍ଥିବ ବିଭବ 

ତୁମ ପାଇଁ ଉତ୍ସର୍ଗୀକୃତ ମୁଁ ଜନମ ଜନମ 

     ମୁଁ ତୁମର ପ୍ରିୟତମା ତୁମେ ମୋ ପ୍ରିୟତମ।