ପ୍ରୀତି ନିର୍ଝରିଣୀ

ଲିଭିବନି କେବେ ଆଖିତଳୁ ମୋର

ତୁମରି ଅଭୁଲା ନାମ

ହଜିବନି କେବେ ମୋ ମନରୁ ସଖୀ

ତୁମରି ମଧୁର ପ୍ରେମ I

ଶୁଖିବନି କେବେ ପ୍ରୀତି ନିର୍ଝରିଣୀ

ତୁମ ପ୍ରେମସୁଧା ବାରି

ଖାଲି ହେବନାହିଁ ତୁମ ସ୍ଥାନ କେବେ

ମୋ ହୃଦୟ ସ୍ୱପ୍ନପୁରୀ I

ମରିବନି କେବେ ବିଶ୍ୱାସ ମୋହର

ସାଇତା ଯା ହୃଦତଳେ

କ୍ଷୀଣ ହେବନାହିଁ ନିଃଶ୍ୱାସର ଗତି

ତୁମପାଇଁ ଯାହା ଚାଲେ I

ଭରସା ମୋହର ତୁମଠାରୁ କେବେ

ହୋଇବ ନାହିଁ ଲୋ ଉଣା

ଆଖିତଳେ ପରା ତୁମେ ରହିଅଛ

ହେବି କିଆଁ ବାଟବଣା ? 

ଝରିବନି ମୋର ଆଖିରୁ ଲୋତକ

ଉଠିବନି କେବେ କୋହ

ଯେତେଦିନ ଯାଏ ଦେଖୁଥିବି ସଖୀ

ତୁମ ହସ ହସ ମୁହଁ I

ତୁମେ ତ ଦେଉଛ ସ୍ୱର୍ଗସୁଖ ମୋତେ

ଏ ମର ମରତ୍ତ ଧାମେ

ଖୁସିମନେ ସଦା ଜୀଇଁବି ଲୋ ସଖୀ

ଭିଜି ଭିଜି ତୁମ ପ୍ରେମେ I