ପ୍ରେମିକା

ପ୍ରେମିକା

ଶୀତ ସକାଳର 

ମୁଠାଏ କଅଁଳ ଉଷ୍ଣତା,

କେବେ ଖରା କେବେ ଛାଇ

କେବେ ପୁଣି ବସନ୍ତର

ଭିଜା ଭିଜା ସିକ୍ତ ମାଦକତା ।

ପ୍ରେମିକା 

ଆଂଜୁଳାଏ ମଖମଲି 

ସ୍ବପ୍ନର ପହିଲି ସ୍ତବକ,

କେବେ ପୁଣି

ବେଦନା ବିଧୁର ମନର

ଅସରନ୍ତି ଲୁହ ବିନ୍ଦୁ 

କେବେ ସ୍ମୃତିର କୋମଳ କଦମ୍ବ ।

ପ୍ରେମିକା 

ନୀଳ ଆକାଶର ଚନ୍ଦ୍ରମା,

ଚନ୍ଦନ ବନର ବାସ୍ନା 

କେବେ ଭିଜା ଶ୍ରାବଣର

ରିମଝିମ୍ ସୁର,

ପୁଣି କେବେ ଗହନ ବନର

ଶାନ୍ତ ସ୍ନିଗ୍ଧ ନୀରବତା  

ଆଉ କେବେ ମିଠା ମିଠା 

ରଜତ ଧବଳ ଜ୍ୟୋସ୍ନା ।

ପ୍ରେମିକା 

କେବେ ବୈଶାଖର ତାଣ୍ଡବ,

ଅମାବାସ୍ୟାର ଘନ ଅନ୍ଧକାର 

ପାଉଁଶିଆ ସନ୍ଧ୍ୟାର ସ୍ତୀମିତ ଆଲୋକ ,

କେବେ ପୁଣି ପୂର୍ଣିମାର ପୂର୍ଣ୍ଣଚାନ୍ଦ

ଚିର ଆକାଂକ୍ଷିତ 

ଚିର ଈପସିତ 

ହୀରା, ମୋତି, ମାଣିକ୍ୟର 

ଝଲମଲ ଖୋସାର ଗଜରା  ।

ପ୍ରେମିକା 

ପ୍ରଣୟ ପସରା

ପ୍ରୀତିର କୁଳୁକୁଳୁ ପାହାଡୀକନ୍ୟା ,

ଚେନାଏ ବିଶ୍ବାସର ମଧୁର ମୂର୍ଚ୍ଛନା

ଢଳ ଢଳ ରଜନୀଗନ୍ଧା

ସୂର୍ଯ୍ୟାସ୍ନାତ ଶିଶିର ବିନ୍ଦୁର

ଛଳ ଛଳ ଆସ୍ତରଣ ତଳେ

ଧ୍ୟାନମଗ୍ନା ପୁଣି ସ୍ବପ୍ନସିଦ୍ଧା

ପ୍ରେମର ଅବାରିତ ଗଙ୍ଗା  ।