ପ୍ରେମାର୍ଘ୍ୟ

ମନ୍ଦିରରେ ତୁମ ଛବି ଆଜି

ଭାବରେବି ତୁମ ଭାବ,

ଦେହରେ ଲଗାଏ ନିଆଁ ଏବର୍ଷା

ମିଠା ମିଠା ଅନୁଭବ ।

ବର୍ଷା ଛାଡ଼ିଗଲେ ଧରଣୀ ଫାଟେ

ହୃଦୟ ଚଟାଣ ଖୋଳି,

ନାହିଁନାହିଁ କରି ତୁମରି କୋଳରେ

ଦିବାସ୍ବପ୍ନେ ଯାଏ ଢ଼ଳି ।

ବାଦଲ ବୁକୁରେ ଜହ୍ନ ଲୁଚିଯାଏ

ଦେହ ଭିଜିଯାଏ ବର୍ଷାରେ,

ତୁମରି ସାଥିରେ ଲୋଟିଯିବା ପାଇଁ

ଭାରି ଇଚ୍ଛାହୁଏ ରାତିରେ ।

ପ୍ରେମକୁ ଖୋଜିନି ବଜାର ହାଟରେ

ସମର୍ପଣେ ପ୍ରେମ ଥାଇ,

ଓଠ ଧାରେ ହସ ଲହରୀ ଖେଳିବ

ତୁମ ଓଠର ଚୁମ୍ବନ ପାଇ ।

ଭିଜାଭିଜା ବାସ୍ନା କରେ ଆନମନା

ଉଦ୍ଭାସିତ ହୁଏ ରବି,

ନିର୍ଜନ ଲଗ୍ନରେ ପ୍ରେମ ଅଭିସାର

ପାଗଳ ହୁଏମୁଁ ଭାବି ।

ତୁମ ଆଖି-ଓଠ କରେ ମତେ ଦୁଷ୍ଟ

ମନରେ ଲଗାଏ ନିଆଁ,

କାମନା ଜ୍ବାଳାରେ ଜଳିଜଳି ନୀତି

ଖୋଜେ ତୁମ ପ୍ରୀତି ଛୁଆଁ ।

ଫୁଲକୁ ଭ୍ରମର ଚୁମିବା ବେଳେ

ଦେଖି ସହେନାହିଁ ଦେହ,

ଓଠର ଦୁଆରେ ଲାଜେଇ ଚୁମାଟି

କେବେ ଆଙ୍କିଦବ କୁହ?