ପ୍ରେମ

ଆସ ଦେଖି ଯାଅ 

ମୋ ସହରକୁ 

ଏଠି ଖାଲି ପ୍ରେମ 

ନିଭେଜାଲ ପ୍ରେମ 

ଜବରଦସ୍ତ ପ୍ରେମ 

ଖାଲି ପ୍ରେମ ଆଉ ପ୍ରେମ ।

ପ୍ରେମ ଏଠି ଅନେଇଛି 

ଗୋଲ ଗୋଲ ଆଖିରେ 

ସବୁଜ ପତ୍ରର ଉହାଡରେ 

ଆଉ ପ୍ରତିଦିନ ଫୁଟି ଝଡୁଥିବା 

ହଳଦି ନାଲି ଫୁଲର ପାଖୁଡାରେ ।

ସେ ମତେ ପ୍ରତିଦିନ ଡାକେ 

ଆଖି ଚିରି ଦେଖେ 

ମନ ଖୋଲି ଗପେ 

କୋଇଲିର ମିଠା ମିଠା ସ୍ବରରେ

ପାହାଡର ଅଦୃଶ୍ୟ ଆଖିରେ 

ଆଉ ଝରଣାର ଶୀତଳ ଜଳରେ ।

ମୁଁ ଖୋଜିବୁଲେ ପ୍ରେମର ସଂଜ୍ଞା 

ଗୋଟେ ପ୍ରେମିକ ପରି 

ମଥାକୁ ହଳଦି କରି 

ମୁଣ୍ଡ ଟେକିଥିବା ଅଳସୀ ଫୁଲରେ 

ହଳହଳ ହେଇ ବୁଲୁଥିବା 

ପ୍ରଜାପତିଙ୍କ ଦଳରେ ।

ମୁଁ ଫି ଦିନ୍ ଆସେ 

ଖାସ୍ ତାକୁ ଭେଟିବା ପାଇଁ 

ହେଲେ କଣ ହେବ 

ମୁଁ ଭେଟିବା ଆଗରୁ 

ସେ ମତେ ଭେଟେ 

ଶୋରିଷ କ୍ଷେତର ଶୋରିଷିଆ ବାସରେ 

ପ୍ରେମିକା ପଛରେ ଘୁରି ବୁଲୁଥିବା

ଭ୍ରମରର ଗୁଣୁଗୁଣୁ ଶବ୍ଦରେ ।

ମୁଁ ହାରିଯାଏ 

ସବୁଥର ପରି 

ସେ ଏଥର ବି ଜିତିଯାଏ 

ମତେ ଜଳେଇ ଜଳେଇ 

ବେଧଡକ ହସେ 

ଝରଣା ପାଖର ବନ୍ଧୁର ଶିଳାରେ 

ଆଉ ଆକାଶ ଛାତିରେ 

ଜହ୍ନର ଓଠରେ ।