ଶୀତ ସକାଳ

*ଶୀତ ସକାଳ*

ଧାନ ବିଲ କୋଳେ ସୁନେଲି କେଣ୍ଡାରେ 

ଆସେ ଯେ ବାଘୁଆ ଶୀତ 

ଶୀତ ସକାଳର ଶୀତଳ ଛୁଆଁରେ

ଚଷା ପୁଅ ଗାଏ ଗୀତ ।

ଓଠ ଥୁରୁଥୁରୁ ଦେହ ଥୁରୁଥୁରୁ 

ଥୁରୁଥୁରୁ ପୁଣି ପାଦ 

ସେଇ ସକାଳର ଶୁଭ ଲଗନରେ 

ଗହମ ଗୋରୀ ଯେ ଛଡାଏ ନିଦ ।

ପୋଖରୀ ପଠାର ଖସରା ତୁଠରେ 

କୁଆଁରୀ ମାଜଇ ଦେହ 

ବେହେରା ସାହିର ନିଧି ବୁଢୀ ଘରେ 

ମହକି ଆସୁଛି ଘିଅ । 

ଟିମ,ରିଙ୍କୁ,ଆଉ ମୋହନା,ପବନା 

ଜିତୁ ସିତୁ ସହ ମିଶି 

ନିଆଁ ଯେ ପୁଆନ୍ତି ଶନିଆ ବାଡିରେ

କରି ମନ କେତେ ଖୁସି । 

ସୁନେଇ ମାଉସୀ ସାନ ବୋହୁ ଉଠି 

କରେ ଘର ଲିପା ଲିପି 

ଗୁରୁବାର ବୋଲି ମଦନାର ଝିଅ 

ଦାଣ୍ଡରେ ପକାଏ ଝୋଟି । 

ରତନା ସାହୁ ଟା ଏତେ ଯେ କୋଢିଆ

ପଡିଛି ଶେଜକୁ ମାଡି 

ରାମ ବାବୁଙ୍କର କୁନି ନାତୁଣିଟି

 ବାହାରି ଗଲାଣି ପଢି । 

ସୋରିଷ କ୍ଷେତରୁ ସୋରିଷିଆ ବାସ

 ଛଡାଇ ଆଣେ ପବନ 

କୋଇଲିର କୁହୁ କୁହୁ ମିଠା ସ୍ବର 

ଭିଜାଇ ଦିଏରେ ମନ । 

ସୁଲୁସୁଲୁ ବାଆ ବୁଢୀ ମାଉସୀର

 ଥରାଏ ପାକୁଆ ପାଟି

ଥରି ଥରି ସେ ଯେ ଜହ୍ନ ମାମୁଁ କଥା 

କୁହେରେ ଗୋଟି କି ଗୋଟି । 

ହରି ଭାଇନାଙ୍କ ଚା ଦୋକାନରେ 

ଜମେରେ କେତେ ଯେ ଖଟି 

କିଏ ଯେ ସରସ କିଏ ଯେ ନୀରସ

କାହାର କେତେ ଟି ପାର୍ଟି ।