ଲାଇବ୍ରେରୀ
ପ୍ରୋଫାଇଲ୍
ପ୍ରେମ ରଙ୍ଗ
ପ୍ରେମ ରଙ୍ଗ
ସାତ ରଙ୍ଗ ଆଜି ଫିକା ପଡ଼ିଯାଏ
ଗୋରୀ ତୋ ଗୋଲାପୀ ଓଠେ,
ଫଗୁଣର ଫଗୁବୋଳା ହସ ତୋର
ମଳୟ ବାସରେ ଫୁଟେ।
ହେଲେ ଫଗୁଣଟା ଫୁଲେଇ ହେଉଛି
ହୃଦୟ ମୋ କାହିଁ ଜଳେ,
ଅକୁହା ସେ ମୋର ପ୍ରୀତିର ବେଦନା
ତେଣୁ ନିତି ଝୁରି ମରେ ।
ଚୋରା ଚଇତାଳି ଖେଳି ଲୁଚକାଳି
ପ୍ରେମ ମୋ ବିଗାଡି ଦେଲା,
ଛଇଳି ମାନିନୀ ତୋ ଚୋରା ଚାହାଣି
ମୋ ମନ ଚୋରେଇ ନେଲା।
ଝୁମିଝୁମି ଆସି ନୂପୁର ଶବଦେ
ଯେବେ ନେଲୁ ମୋତେ କିଣି ,
ଭରା ଯଉବନେ ଉଛୁଳା ତରଙ୍ଗେ
ନିଦ ମୋ ହଜେଇଲୁଣି।
ଫଗୁଣେ ହସୁଛୁ ଶ୍ରାବଣେ ରୁଷୁଛୁ
ବୈଶାଖେ କରୁଛୁ ମାନ,
ତଥାପି ଜାଣେନା କାହିଁକି ମୁଁ ଯାଚି
ଦେଇଛି ତୋତେ ମୋ ମନ।
ତୁ ହସିଦେଲେ ଜହ୍ନ ରୁଷିଯାଏ
ଲୁଚେ ମେଘ ବାଦଲରେ,
ତୋ ଆଖିରୁ ଯଦି ଲୁହ କେବେ ଝରେ
ଫୁଲ ପୁଣି ମନମାରେ।
ଧୀର ସମୀରଣେ ତୋ ବେଣୀ ଅତର
ମୋ ଦେହେ ଯେବେ ବାଜିଲା,
ସେହି ଦିନୁଁ ମୋର ହୃଦ ବଗିଚାରେ
ପ୍ରୀତି ଗୋଲାପ ଫୁଟିଲା।
ମଖମଲୀ ଶେଯ ମଉଳିଛି ଆଜ
ଗୋରୀ ତୋର ପ୍ରତୀକ୍ଷାରେ,
ଆ' ପ୍ରିୟା ମୋର କରନା ଉଛୁର
ତୃଷ୍ଣା ମେଣ୍ଟୁ ଅବହେଳେ।
ନରମ ପରଶେ ହରଷିତ କର
ଉଚ୍ଛ୍ଵାସ ଛାତି ପରାସ ,
କୁନିକୁନି ପାଦେ ଥିରି ଥିରି ଆସି
ମୋ କୋଳରେ ଥରେ ବସ ।
ଚାତକ ପରାଏ ଚାହିଁ ମୁଁ ବସିଛି
ନିଜର କରିବାପାଇଁ,
ତୋର ମେଘମାଳା କେଶକୁ ହରଷେ
ହସ୍ତେ ଦେବି ସାଉଁଳେଇ।
ଶିହରୀ ଉଠିବ ତୋର ତନୁମନ
ଛାତିରେ ଲାଗିବ ନିଆଁ,
ଫିସ୍ଫିସ୍ କଥା କିଛି ଦୀର୍ଘଶ୍ୱାସେ
ବାଜିବ କାଉଁରୀ ଛୁଆଁ।
ହରିତ ସୁଷମା ଲୋହିତ ବର୍ଣ୍ଣରେ
ଦିଶିବୁ କେଡେ ସୁନ୍ଦର,
ପୁଳା ପୁଳା ପ୍ରେମ ରଙ୍ଗ ଲାଗିଯିବ
ତନୁରେ ପ୍ରିୟା ତୋହର।
ଗୋଲାପି ରଙ୍ଗର ଓଠ ତୋର ସଖୀ
ନିରତେ ଫିକା ପଡିବ,
ପ୍ରୀତି ଚୂମ୍ଵନରେ ସେହି ପ୍ରେମରଙ୍ଗ
ଦାଗ ହୋଇ ଲାଗିଯିବ।
