ପ୍ରେମ ଓ ପ୍ରେମିକା

ତୁମ ହୃଦୟକୁ ଦେଖିବାର ଦୁର୍ବାର ଅଭିପ୍ସା

ମୋ ହୃଦୟର ସ୍ପନ୍ଦନ ପଥରୋଧ କରିଦିଏ

ରଙ୍ଗହୀନ ମନରେ ରଙ୍ଗମୟ ଭାବାନ୍ତର

କାହିଁ କେଜାଣି ବେରଙ୍ଗି ଇଛାକୁ ରଙ୍ଗ ଭରିଦିଏ

ତୁମ ଆମ ହୃଦୟର ରଙ୍ଗ କିଏ ବା ଦେଖିଛି

ତଥାପି ସପ୍ତ ରଙ୍ଗରେ ଆଚ୍ଛାଦିତ ସ୍ବପ୍ନ ସବୁ

ନଦେଖିଲା ରଙ୍ଗ କଳା ମଚ ମଚ ପରି

କଳା ହୃଦୟ ଭିତରେ ଲାଲ ପ୍ରେମକୁ ଅପେକ୍ଷା କରିଛି। 

ପ୍ରେମ ଲାଲ ହେଉ କି ସବୁଜ

ସେ ନିଶବ୍ଦ ଜୀବନର ସଶବ୍ଦ ଝଙ୍କାରଟିଏ,

ସେ ନିରସ ଜୀବନ ର ସରସ ଛବିଟିଏ,

ସେ ପ୍ରୀତିର ଆକାଶରେ ସ୍ନେହଭରା ଧୃବତାରାଟିଏ,

ସେ ମନ ଡାଇରିରେ ମମତାର ପୂଞ୍ଜିଭୂତ

ଲୁହ ଲହୁର ଅସମାପ୍ତ କବିତାଟିଏ,

ସେ ବାସ୍ତବ ଛାୟାର ଅବାସ୍ତବ ପ୍ରଛାୟାଟିଏ,

ସେ ସୀମାହୀନ ଭାବନାର ମୂର୍ତ୍ତିମନ୍ତ ପ୍ରତୀକଟିଏ।