ପ୍ରେମ ନା ଆକର୍ଷଣ

ବଦଳିଛି ସଂଜ୍ଞା ବଦଳିଛି ପ୍ରଥା

କଳୁଷିତ ପ୍ରେମ ଆଜି

ବାଲିଘର ଭଳି ସମ୍ପର୍କ ଭିତ୍ତିରେ

ପ୍ରଣୟ ପାଇଁ କି ରାଜି।

ପ୍ରେମର ସ୍ଥାୟୀତ୍ୱ ମାଗିଲେ ପ୍ରଣୟ

ତାହାକୁ ଅଟଇ ପ୍ରେମ

ଆକର୍ଷଣ ଆଜି ପ୍ରେମର ମୁଖାରେ

କରେ କେତେ ଘୃଣ୍ୟ କାମ।

ଯୌବନରେ ପାଦ ନୂଆଁ ନୂଆଁ ଥୋଇ

କାମନା ରଙ୍ଗରେ ରଙ୍ଗୀ

କାହିଁ ଯେ ଭୁଲନ୍ତି ସଂସ୍କାର ସଣ୍ଠଣା 

ବଦଳେ ଯେ ଅଙ୍ଗଭଙ୍ଗୀ।

ବାପାଙ୍କ ବିଶ୍ୱାସ ମାଆ ଆଦରର 

ଗଳାଟିକୁ ଚିପି ଦେଇ

ଏକି ସମ୍ମୋହନ ବାପା ମାଆ ସ୍ନେହ

ଯାଏ ଧୂଳିରେ ମିଳେଇ।

ଆକର୍ଷଣ ସାଜେ କେତେ ମୂଲ୍ୟବାନ

ବିଶ୍ୱାସ ହୁଅଇ ଶସ୍ତା

ବିରହ ସାଜିଲେ ଶେଷସ୍ଥଳ ତାର

ପଶ୍ଚାତାପ ଶେଷ ରାସ୍ତା।

ଅତୀତ ସ୍ମୃତିକୁ ଧମକ ସଜେଇ

ପ୍ରାଣ ସଙ୍ଗେ ଖେଳ ଚାଲେ

ଫେରିକି ପାଇବ ପୁରୁଣା ସମ୍ପର୍କ 

କେତେ ଅନୁତାପ କଲେ।

ବୃକ୍ଷାଚ୍ୟୁତ ଫଳ ଲାଗେ କି ବୃକ୍ଷରେ

ମୃତ ପାଏ କି ଜୀବନ

ଝରାଇଲେ ଲୁହ ମିଳିବନି ଆଉ

ହାରିଥିବା ସନମାନ।

ପ୍ରେମକୁ କରନି କଳୁଷିତ ଆଉ

ଈଶ୍ୱରଙ୍କ ଶେଷ ସୃଷ୍ଟି 

ମିଛ କାମନାରେ କାହିଁ ବଶୀଭୂତ

ଲକ୍ଷ୍ୟ ପଥେ ଦିଅ ଦୃଷ୍ଟି।