ପ୍ରେମ ମାସ

ଫଗୁଣେ ବୋଳିଲୁ     ଅଲିଭା ଅବିର

     ଓଦା କଲୁ ଶ୍ରାବଣରେ

ଭୁଲିଗଲି ଯେତେ     ଜଳିଥିଲି ମୁହିଁ

     ବୈଶାଖର କିରଣରେ।

ମାଘରେ ଏ ସନ    ଅଲୋଡ଼ା କମ୍ବଳ

    ଅଲୋଡ଼ା ଆଷାଢ଼େ ଛତା

ଥରିବାକୁ ଦେଏ     ଭିଜିବାକୁ ଦେଏ

     ଭୁଲି ଚୈତ୍ରର ଉଷ୍ମତା।

ଆଶ୍ୱିନ ମାସର     ପାର୍ବଣ ପରି ତୁ 

    ଆସିଲୁ ମୋର ଜୀବନେ

ପ୍ରେମ ନିଆଁ ଜାଳି   ଶୀତଳ ପୁଷରେ

   ବାନ୍ଧିଲୁ ପ୍ରେମ ବନ୍ଧନେ।

ନୂଆଁ ନୂଆଁ ପ୍ରିୟା    ଭାଦ୍ରବର ଭାବ

     ଦେଖିବା ନୂଆଁ ସପନ

ଜେଷ୍ଠରେ ସାଜିବୁ   ତୁ ମୋ ସାବିତ୍ରୀ

     ମୁଁ ଯେ ତୋର ସତ୍ୟବାନ।

ସାଥି ହୋଇ ଯିବା    ମନ୍ଦିରକୁ ବୁଲି 

     ଧର୍ମ ମାସ କାର୍ତ୍ତିକରେ

ମୋ ଘର ଅଗଣା   ଚାହିଁ ରହିଛି ଲୋ 

    ଝୋଟି ଦେବୁ ମାର୍ଗଶିରେ।