ପିଣ୍ଡ ରୁ ପରାଣ ଯେତିକି ଦୂର

ମୋ ଠାରୁ ତୁମର ଦୂରତା ହେ ପ୍ରଭୁ 

   ଯମା ନୁହେଁ ବେଶୀ ଦୂର 

ଅନ୍ତରରେ ମୋର ରହିଅଛ ଲୁଚି 

   ଲାଗେ ମତେ ବହୁଦୂର 

ଜହ୍ନରୁ ଜୋଛନା ଦୀପରୁ ଆଲୋକ 

    ରହିଥାଏ ଯେତେ ଦୂର 

ମୋ ଠାରୁ ତୁମର ଦୂରତା ହେ ପ୍ରଭୁ 

     ଅଟଇ ସେତିକି ଦୂର 

ତୁମ ମୋ ଭିତରେ ଦୂରତା ସେତିକି 

    ଯମା ନୁହେଁ ବେଶୀ ଦୂର 

ସବୁତ ଦେଇଛ ହୃଦୟରେ ମୋର 

    ସକଳ ଶକ୍ତି ତୁମର 

ଆତ୍ମା ରୂପେ ରହି ହୃଦୟ ଭିତରେ 

     କରିଛ ପ୍ରାଣ ସଞ୍ଚାର 

ତଥାପି କାହିଁକି ନିତି ଖୋଜୁଥାଏ 

   ଦେଖିବାକୁ ସତ୍ତା ତୁମର 

ମୋ ଠାରୁ ତୁମର .................ll  

କରି କରାଉଛ ଅନ୍ତରରେ ରହି 

   ଦେଇ ମତେ କର୍ମ ଡୋରି 

ମାୟାରେ ପୁରାଇ ସବୁ ଭୁଲାଉଛ 

   ଭାଗ୍ୟକୁ ବସେ ମୁଁ ଧରି 

ସତ କୁହ ପ୍ରଭୁ କିଏ ବା ସମର୍ଥ 

    ବୁଝିବ ଖେଳ ତୁମର 

 ମୋ ଠାରୁ ତୁମର............. ll   

ତୁମେ ଯେବେ ଅଛ ଜାଗ୍ରତ ହୋଇଣ 

    ଏ ମୋର ମାଟି ପିଣ୍ଡରେ

କାହିଁକି ହେ ପ୍ରଭୁ ଜାଣି ମୁଁ ପାରୁନି 

    ଲାଗେ ଅଛ ବହୁଦୂରେ 

କିବା ଦିନରାତି ଖୋଜୁଥାଏ ନିତି 

    ଦେଖିବାକୁ ରୂପ ତୁମର 

ମୋ ଠାରୁ ତୁମର............... ll

ପ୍ରତିଟି ପରାଣେ ରହିଅଛ ତୁମେ 

    ତୁମ ବିନା ଗତି ନାହିଁ 

ତମ ଇଚ୍ଛା ବିନା ସୂର୍ଯ୍ୟ ଚନ୍ଦ୍ର କେବେ 

     ଉଦୟ ହୁଅନ୍ତି ନାହିଁ 

ଦୀପରୁ ସଳିତା ଭାବରୁ ଭାବନା 

   ଏ ସବୁ ଯେତିକି ଦୂର 

ତୁମ ଠାରୁ ମୋର ଦୂରତା ସେତିକି 

     ନୁହେଁ ଯମା ବେଶୀ ଦୂର 

ପିଣ୍ଡରୁ ପରାଣ ଯେତିକି ଦୂର......... ll