ଫେରି ଆସ ବନ୍ଧୁଗଣ

ବୟସ ଲହଡି ମାରୁଥିଲା

ପବନରେ କାଗେଜି ଫୁଲ

ଦୋହଲିଲା ପରି

କେତେ ସାହାଯ୍ୟ ଛୁଟିଆସୁଥିଲା

ସକାଳ କାକର ବିନ୍ଦୁ ସରି ।

ଏବେ ଖାଲି ପଚାରିଲି

ବଙ୍କୁଲିବାଡିଟା କାହିଁ

ବୋହୂ ଧରାଇଲା

ଘରପୋଛା ମପ୍ ନେଇ

ଚଷମାଟା ଆଣିବାକୁ

ଡାକ ପକାଇଲେ

ଭିତରୁ ଉତ୍ତର ଆସେ, 

ବାସନମଜାରେ ଚଷମା କି ତୁଲେ ।

ହେ ପ୍ରିୟ ବନ୍ଧୁଗଣ

ତୁମେମାନେ ବି ଏମିତି ଥିବ ନା

ଆସ ସବୁ ଏକାଠି ହେବା

ବିଦ୍ୟାଳୟର ଅଗଣା

ଖେଳିବାକୁ ରୁମାଲ ବାନ୍ଧିବାକୁ

ଦରକାର ପଡିବନି

ଜଲଦି ଧରିପକେଇବ

ଚୋର ହେବାକୁ ଆଉ 

ବିରକ୍ତ ଲାଗିବନି ।

ଫେରି ଆସ ବନ୍ଧୁଗଣ

କାହାଣୀ ଛଳରେ କହିବା

ଆମ ଜୀବନୀ, ଆମ କାହାଣୀ

ଭୁଲିଯିବା ଭୋକ ଶୋଷ

ଆମ ଲୁହ ଭିଜା ହସରେ ପୁଣି ।