ପାରିନାହିଁ କେହି ପାରିବେନି

କୋଟିକୋଟି ବର୍ଷ ତଳୁ ରହିଛନ୍ତି-ଅସରପା ମଶା ଝିଟିପିଟି,

ଯେତେ ବିଷଦିଅ ଯେତେମାର ପଛେ ରହିଥିବେ ସିଏ ଲୁଚିଛପି |

ଖଟତଳେ ଲୁଚି ରହିବେ ଓଡ଼ଶ କାମୁଡିବେ ବେଳକାଳ ଦେଖି,

ମରିବେନି ଉଈ ସବୁ ବିଷ ଖାଇ ଆସୁଥିବେ ସାଙ୍ଗ-ସାଥୀ ଡାକି |

ଠକ-ଲାଞ୍ଚଖିଆ ଚୋର ଫିସାଦିଆ ବଞ୍ଚି ରହିଥିବେ ଟାଉଟର,

ଯେତେ ମାଡ଼ଦିଅ ଜେଲକୁ ନିଅ ଫାଶୀଦଣ୍ଡ ପାଇଁ ନାହିଁ ଡର |

ଟେବୁଲ ତଳେ କି ନିରୋଳା ଜାଗାରେ ଅନ୍ଧାର ଭିତରେ କାରବାର,

ସରକାରୀ କଳ ମୂଷାମାନେ ଲୁଚି ଦେଶକୁ କରନ୍ତି ନାରଖାର |

ସୁରକ୍ଷା ନାମରେ ଥାଆନ୍ତି କେତେକ ଚୋରଠାରୁ ସିଏ ଭୟଙ୍କର,

କ୍ଷମତା ବଳରେ ଆମ୍ବରସ ଖାଇ ଟାକୁଆ ବାଣ୍ଟନ୍ତି ଅଫିସର |

ଦୁର୍ନୀତି ଅନ୍ୟାୟ କରୁଛନ୍ତି ଯିଏ ସେମାନଙ୍କ ଚେର ଟାଣ ଭାରି,

ଅତୀତରେ କେହି ପାରିନାହିଁ ତାଙ୍କୁ ପାରିବେନି ଯୁଗଯୁଗ ଧରି |