"ପାଣିଫୋଟକାର ଏଇ ଜୀବନ "
"ପାଣିଫୋଟକାର ଏଇ ଜୀବନ "
ପାଣିଫୋଟକାର ଏଇ ଜୀବନ
ଧାରାଶ୍ରାବଣର ପଥ ପ୍ରାନ୍ତ ଗଡାଣିରେ
ସୃଷ୍ଟି ହେଉଥିବା ଅସଂଖ୍ୟ ପାଣିଫୋଟକାର
ଅପ୍ରତ୍ୟାଶିତ ବିଲୀନତା ପରି
ଏ ଜୀବନ
ସମୟର ନିର୍ଘଣ୍ଟରେ କେତେବେଳେ ମିଳେଇ ଯିବ ଜଣାନାହିଁ
ଆଶା, ଅଭିଳାଷ ଆଉ ସ୍ୱପ୍ନର ବାସ୍ତବତାକୁ ସାର୍ଥକ କରି ତୋଳିବାର
ପ୍ରତିଟି କର୍ମ ବ୍ୟସ୍ତତା ଭିତରେ
ଏ ଜୀବନ ତଥାପି ଚାଲିଛି
ବର୍ତ୍ତମାନର ପ୍ରତିଟି ମୁହୂର୍ତ୍ତକୁ ସାମ୍ନା କରି l
ସ୍ମୃତିର ମାନସପଟରେ
ସବୁକିଛିକୁ ଛାଡିଦେଇ
ସମୟର ଡ଼ାକରାରେ ଅତୀତ ତା'ର ଚାଲିଯାଏ
କେଉଁ ଏକ ଅଫେରା ବାଟର ବାଟୋଇଟିଏ ହୋଇ
ଆଉ ଭବିଷ୍ୟତର କଥା କିଏ ବା ଜାଣିଛି
ସେ ତ ଅଦୃଷ୍ଟ ଅସ୍ପଷ୍ଟ
ଅନ୍ଧକାରର ଏକ ନିଷିଦ୍ଧ ଇଲାକା
ତେଣୁ ବର୍ତ୍ତମାନ ହିଁ ମୂକ ସାକ୍ଷୀ
ଆଉ ଆଗାମୀର ପ୍ରତିବିମ୍ବ l
ଜୀବନ ରଣାଙ୍ଗନରେ
କ୍ଷଣଭଙ୍ଗୁରତାର ଅସ୍ଥିରତାକୁ ସ୍ଥିରୀକୃତ କରୁ କରୁ
ଏ ଜୀବନ ବେଳେବେଳେ ଥକିପଡେ
ଅଳ୍ପ ଦିନର ଗଳ୍ପ ଭିତରେ
କେତେବେଳେ ସଫଳତାର କାହାଣୀଟିଏ ରଚନା କରିଦେଇ ଯାଏ ତ
ପୁଣି କେତେବେଳେ ବିଫଳତାର ପ୍ରଚଣ୍ତ ପଦାଘାତରେ
ନିଜର ଅସ୍ତିତ୍ୱକୁ ହରେଇ ବସେ l
ଜୟ ପରାଜୟର ଦ୍ଵନ୍ଦ୍ୱ ଭିତରେ
ନିଜ ଅସ୍ତିତ୍ୱର ଉପସ୍ଥିତିକୁ ପ୍ରତିପାଦିତ କରୁ କରୁ
ଏ ଜୀବନ ବେଳେବେଳେ ନିରବିଯାଏ
ବାକ୍ ଶୂନ୍ୟତାର ଅସହାୟତା ଭିତରେ
ସତେ ଯେମିତି ପ୍ରତ୍ୟୟମାନ ହୁଏ
କାଳର କାଳନେମୀ ପାଖରେ
ଏ ଜୀବନ କେତେ ଅସହାୟ ସତେ l