ପାଳି

ଦଶ ମାସ ଧରି ଗରଭେ ମୋହରି

କରି ବାର ଓସା ବ୍ରତ

ଜନମ ଦେଲି ମୁଁ ଯାହାଙ୍କୁ ପ୍ରଭୁ ହେ

ଗୋଡ଼ାଇ ମାରନ୍ତି ନାତ |

ଅତୀତରେ ସାତ ପୁଅର ଜନନୀ

ଭାବି ହେଉଥିଲି ପ୍ରୀତ

ମଣିଷ କରିବା ପାଇଁକି ସହିଛି

ଦୁଃଖ ମୁଁ ଯେ ଅପ୍ରମିତ୍ତ |

ସେହି ପୁଅ ଆଜି ପେଟକୁ ମୋହର

ଦେବା ପାଇଁ ଭାତ ଥାଳି

ଭାଗ ବାଣ୍ଟ କରି ମୋ ସାଥେ ଦିନକୁ

ଦିଥର କରନ୍ତି କଳି |

ବଡ଼ ପୁଅ କହେ ପୋଷିବି ମୁଁ କିଆଁ

ବୋହୂ ତୋର ଦିଏ ଗାଳି

ପୋଷିବୁ ଏଥର ବଉ ତୋତେ ଆମେ

ସାତ ପୁଅ କରି ପାଳି |

ସାନ ପୁଅ ବୋହୂ ବିଦେଶେ ରୁହନ୍ତି

ପାଶେ ତାର ସଳା ଶାଳୀ

ମାଆ ପାଇଁ ତାର ଦରମା ନିଅଣ୍ଟ

କହେ ମୁଁ ପାରୁନି ଚଳି |

ଜଣ ଜଣ କରି ସବୁ ପୁଅ ମୋର

ଜାଣି ନ ଜାଣିଲା ଭଳି

ବୈଠକ ବସେଇ ନିଷ୍ପତ୍ତି କରିଲେ

ପାଳି କରି ଦେବେ ଢାଳି |

ନିଷ୍ପତ୍ତି ମୋହର ଜଣାଇ ସଭିଙ୍କୁ

ପୁରୁଣା ସ୍ମୃତିକୁ ଜାଳି

ବଡ଼ଦାଣ୍ଡେ ତୋର ଆସିଛି କାଳିଆ

ପକେଇ ଦେ ମୋର ପାଳି |

ଭୋଗିବି ପଛକେ ନରକ ଯନ୍ତ୍ରଣା

ଆଖି ମୋର ମଳିମଳି

ଦେହରୁ ପରାଣ ନେଇ ଯା କାଳିଆ

ବଡ଼ଦାଣ୍ଡେ ପଡ଼େ ଟଳି |