ପାଦଚିହ୍ନ .........
ପାଦଚିହ୍ନ .........
ବିଶ୍ୱବିଜୟୀଂକ ପାଦତଳେ
ଅଳକାନଦୀର ବାଲୁକା ରାଶିକୁ ଚାହିଁ
ଖୋଜୁଥିଲି ସେଇ ଅଗ୍ରଗାମୀ ପୁରୁଷ ପୁଂଗବ
ପାଦଚିହ୍ନ ।
ଜିଜ୍ଞାସା ଓ ଅନ୍ୱେଷାର ନୀଳ ଉତ୍ତାପରେ
ମୁଁ ଥିଲି ସ୍ପନ୍ଦିତ
ଓ ପୁଲକ ପ୍ଲାବିତ ।
କାଳ ତା'ର କ୍ଷିପ୍ରତମ ପକ୍ଷ ମେଲି
ପ୍ରଦକ୍ଷିଣ କରି ଚାଲିଥିଲା
ତା'ର ଚକ୍ରାକାର ପଥ ।
ସେଇ ଚକ୍ରାକାର କାଳଗତି ଆଜି
ଗୋଟିଏ ମୁହୂର୍ତ୍ତ ପାଇଁ ସ୍ଥିର ହୋଇଯାଇଛି
ପୁନଶ୍ଚ ଏଇଠି ।
ବିଶ୍ୱ ବିଜୟୀଂକ ପାଦତଳେ
ପୁନଶ୍ଚ ମୁଁ ଆଜି ଏକାକୀ ।
ଦୃଷ୍ଟି ମୋର ପ୍ରସରିଛି
ଲୁପ୍ତପ୍ରାୟ ଅଳକା ନଦୀର
ବିପର୍ଯ୍ୟସ୍ତ ତଟଦେଶ ଯାଏ
କିନ୍ତୁ ଆଜି ମୁଁ ଆଉ ଖୋଜୁନାହିଁ
ଅଳକା ବାଲିରେ
ପୂତ ପାଦଚିହ୍ନ ।
ଖୋଜୁଛି କେବଳ ସେଇ ପାଦଚିହ୍ନ
ମୋର ଛାତ୍ରଛାତ୍ରୀଙ୍କ
ହୃଦୟ ଓ ମାନସ ପଟରେ ।