ନୂଆ ସକାଳ
ନୂଆ ସକାଳ
ପକ୍ଷୀ କୂଜନରେ ସକାଳ ହେଲାଣି
ଫୁଟିଲାଣି ଫୁଲ ମଧୁ ବନରେ,
କଳସୀ ଧରିଣ ଝିଅ ବୋହୂ ମାନେ
ମିଳିଲେଣି ପୁଣି ତଟିନୀ କୂଳେ ।
ପୂରୁବ ଆକାଶେ କଅଁଳ ସୂରୁଜ
ମଥା ଟେକି ଦେଖ ଆସିଲାଣି,
ସୁନେଲି କିରଣ ଧରାରେ ବିଞ୍ଚି
ସୁନାର ସଂସାର ଭରିଲାଣି ।
ଘଣ୍ଟର ନିନାଦ ଶୁଭିଲାଣି ଦେଖ
ମନ୍ଦିର ମଙ୍ଗଳ ଆଳତି ହେଲାଣି,
ବୋହୂରାଣୀ ପୁଣି ସ୍ନାହାନ ସାରିଣ
ଚଉଁରା ମୂଳେ ଜଳ ଢାଳିଲାଣି ।
କାକର ବିନ୍ଦୁରେ ଘାସ ବୁଦା ଓଦା
ମୋତି ପରି ସେତ ଝଲସିଲାଣି,
ଟିକି ଟିକି ଶିଶୁ ମା କାନି ଧରି
ମା' ମା' ଡାକ ଛାଡିଲେଣି ।
ଝିଅଟିଏ ତାର ଠାକୁର ଘରେ
ଘୃତର ଦୀପାଳି ଜାଳିଲାଣି,
ଶୀତ ସକାଳର ଶିଶିର ବିନ୍ଦୁରେ
ଘାସ,ପତ୍ର,ରୂପା ଦିଶିଲାଣି ।
ପଶୁ,ପକ୍ଷୀ,କୀଟ ପରିଯନ୍ତେ ପୁଣି
ସଭିଁଏ ସ୍ୱାଗତ କରିଲେଣି,
ନବ ସକାଳକୁ ସ୍ୱାଗତ ଜଣାଇ
ନୂଆ ନୂଆ ଆଶା ସଞ୍ଚିଲେଣି । ll