ନନାଙ୍କ ପାଇଁ

ଭାରି ଇଚ୍ଛା ହୁଏ

ତମ ନିର୍ଭୀକ ଛାଇରେ ଠିଆ ହୋଇ

ଜୀବନର ଡହକ ତାତିକୁ ସାମନା କରିବାକୁ !

ତମ ଆଙ୍ଗୁଠିକୁ ଜାବୁଡି ଧରି

ସମତଳ ଭୂଇଁରେ ବି ଟଳମଳ ହୋଇ

ବାଟ ଚାଲିବାକୁ ..

ଆହୁରି ବି ଇଚ୍ଛା ହୁଏ

ଏ ପରିଣତ ବୟସରେ

ତମ କୋମଳ ସ୍ପର୍ଶକୁ

ଆଖବୁଜି ଧିରେ ଧିରେ ଅନୁଭବି

ଗୋଟେ ମିଛ ବିଶ୍ବାସକୁ

ସତ ମଣି ନେବାକୁ ଯେ -

ତମେ ଅଛ ମୋ ଆଖପାଖରେ

ସଦାବେଳେ,

ମୋ ଭଲରେ ମନ୍ଦରେ, ହସରେ ଲୁହରେ

ମତେ ସାହାସ ଦେବାକୁ

ଦୃଢ ରହିବାକୁ !

ଜୀବନର ଯେତେ ସବୁ ବିଷମ ସ୍ଥିତିରେ ..

ତମେ କିନ୍ତୁ ନଥାଅ ଖାଲି ସେହି ସମୟରେ

ମୋ ‘ନନା’ ଡାକରେ

ଉତ୍ତର ଦେବାକୁ,

ଯାହା ତମେ ଭୁଲିଯାଇ

ଦୂରେଇ ରହିଛ ଆମଠୁ

ଦୀର୍ଘ ତିନି ଦଶନ୍ଧିରୁ ..

-0-