ନମସ୍ୟା

ଅରି ନାହିଁବୋଲି   ଅଟୁ ତୁହି ନାରୀ

    ଭବ ସଂସାରର ପରୀ,

କେଉଁ ଜବା ଦେଇ  ପୁଜିଲେ ପୟର

    ବାଣ୍ଟିବୁ ମା ସ୍ନେହଁ ଝରି ॥

ତୁହି ମା ଜନନୀ    ତୁହିତ ଭଗିନୀ

    ତୁହିତ ବୋଲାଉ ଜାୟା,

ତୁହି ନାରାୟଣୀ  ଲକ୍ଷ୍ମୀ ଠାକୁରାଣୀ

     ଜନ୍ମଦାତ୍ରୀ ଯୋଗମାୟା ॥

ସ୍ନେହଁର ଝରଣା     ଫଗୁଣର ଫଗୁ

     ଧାରଣାରେ ତୁ ଧରିତ୍ରୀ,

ରକ୍ଷାର କବଚ   ତୋ ବାଣୀର ବଚ

     ଶତୃପାଇଁ କାଳରାତ୍ରୀ ॥

ତୋ ମୁଖରେ ଫୁଟେ  ଅତସୀ କମଳ

     ତୋ କ‍ାନିରେ ଫୁଲ ଶେଯ,

ତୋହରି ପରଶେ   ଦୁଃଖକଷ୍ଟ ହସେ

     ନୟନେ ଉଏଁ ସୁରୁଜ ॥

ତୋ ବକ୍ଷ ଧରଜେ   ବଇଶାଖି ହଜେ

     ଗୁଣି ହଜେ ଗୁଣ ଗାଇ,

ତୋର ପୃଷ୍ଟଦେଶେ   ବଜ୍ର ନଇଁଆସେ

     ତୋ ହୃଦୟ ଗଂଗା ନଈ ॥

ତୋ ବାହୁ ଯୁଗଳେ    ଶତ ସିଂହବଳ

     ଅଭୟ ଦାୟିନୀ ନାମେ,

ଯୁଗେ ଯୁଗେ ତୁହି    ଶତୃକୁ ଆଦରି

      ଶିକ୍ଷା ଦେଉ ଧରାଧାମେ ॥

ତୁହି ମା ପ୍ରଳୟ     ତୁହି ମା ଆଳୟ

      ତୁହି ମା ପ୍ରେମ ମଳୟ,

ତୋର ଆଶୀର୍ବାଦ   ଢାଳୁଥାଆ ମାଆ

      ଦୁରେ ଯାଉ ବରାଭୟ ॥