ନିଷିଦ୍ଧ ଇଲାକା
ନିଷିଦ୍ଧ ଇଲାକା
ମଣିଷ ଗଢିଛି ସମାଜର ଵିଧି
ବଞ୍ଚିବାକୁ ଶୃଙ୍ଖଳିତେ,
ଆଇନ ତିଆରି ସମସ୍ତଙ୍କ ପାଇଁ
ସମାନ ଯେ ସବୁ ଦେଶେ |
ତଥାପି ଚାଲିଛି ବେଆଇନ କାର୍ଯ୍ୟ
ଆଇନକୁ ଫାଙ୍କିଦେଇ,
ରାତ୍ରିର ଅନ୍ଧାରେ ନାନା ଅପରାଧ
ଘଟେ ରୋଜଗାର ପାଇଁ |
ଭିନ୍ନ ବସତି ଯେ ରହିଛି ସମାଜେ
ନିଷିଦ୍ଧ ଇଲାକା ନାମେ,
ସକଳ ଆଇନ ଆଖି ବୁଜିଥାଏ
ସେଠାକାର ସବୁକାମେ |
ଦେହ ବ୍ୟବସାୟ ଚାଲେ ତ ସେଠାରେ
ମନୋରଞ୍ଜନର ଆଳ,
ଅର୍ଥ ବଦଳରେ ନାରୀର ଶରୀର
ମିଳେ ସେଠି ମାଳ ମାଳ |
ଲମ୍ପଟ ପୁରୁଷ ଯାଏ ପ୍ରତିଦିନ
ଯୌନ ଉପଭୋଗ ପାଇଁ,
ନଥାଏ ମମତା ହୃଦୟର ପ୍ରୀତି
ଲାଳସା ଯେ ଥାଏ ରହି |
କାହା ପରିଚୟ କେହି ବି ଜାଣେନା
କ୍ଷଣିକର ଉନ୍ମାଦନା,
ମଣିଷ ପଣିଆ ହଜିଥାଏ ସେଠି
ଯାହା ଅପରାଧେ ଗଣା |
ନିଶା ବେପାରର କାରବାର ଚାଲେ
ଆଇନର ଅନ୍ତରାଳେ,
ନିଷିଦ୍ଧ ଇଲାକା ଦିନ ଦ୍ବିପ୍ରହରେ
ନିତି ପାପ କରିଚାଲେ |
ଦଲାଲ ମାନଙ୍କ ଜରିଆରେ ସେଠି
ହୁଏ ସବୁ କାରବାର,
ପୁଞ୍ଜି ଯେ କେବଳ କାରଣ ସର୍ବସ୍ବ
ବାଟ କାଢ଼େ କଳଙ୍କର |
ଗରୀବ ଯୁବତୀ କିଣା ହୋଇଆସେ
ବାଧ୍ୟକରେ ପରିସ୍ଥିତି,
ନିଷିଦ୍ଧ ଇଲାକା ବୁଝେନାହିଁ କେବେ
କୋମଳ ମନର ସ୍ଥିତି |
ଜାରଜ ସନ୍ତାନ ଜନମ ହୁଅନ୍ତି
ନିଷିଦ୍ଧ ଇଲାକା କୋଳେ,
ଜୀବନ ତାଙ୍କର ହାହାକାର କରେ
ପଙ୍କିଳ ସମାଜ ତଳେ |
ସୁସ୍ଥ ସମାଜରେ ଅବାଂଛିତ ଏକ
ବିକୃତ ଇଲାକା ଟିଏ,
ନାରୀ ମନ ସେଠି ଜଳି ଯାଇଥାଏ
ମରିବି ସେ ବଞ୍ଚିଥାଏ |