ନିରବିତ ପଥଧାରେ
ନିରବିତ ପଥଧାରେ
ଜୀବନ ବେଳାରେ ସମ୍ପର୍କ ଶିଳାରେ
ଆକର୍ଷଣ ପ୍ରତିକ୍ଷଣ,
ଚିର ମଧୁକ୍ଷରା ନିବିଡ଼ତା ଭରା
ଶ୍ରଦ୍ଧାଭିଜା ଏଇ ମନ ।
ହୃଦୟ ଭାବନା ହୃଦୟ କୁ ଛୁଇଁ
ଆସିଯାଏ ଭାବଧାରେ,
ନିର୍ମଳ ମନର ଆବେଗ ପରଷି
ଲେଖନୀର ମର୍ମତୀରେ ।
ନିଜେ ବିଶ୍ୱାସ ର ମାପକାଠି ହୋଇ
ମମତା ହୃଦୟେ ଆଣି,
ଦି ଦିନ ଜୀବନ ଅମୃତ ବରଷି
ସ୍ବପ୍ନ, ସ୍ମୃତି ର କାହାଣୀ ।
ସବୁଜିମା ଭରା ଅସୁମାରୀ ଆଶା
ଶୂନ୍ୟତା ରୁ ପୂର୍ଣ୍ଣତାରେ,
ନିର୍ମଳ ଚେତନା ଅନ୍ତର ବାସନା
ଭ୍ରମିତ ନୁହେଁ ସଂସାରେ ।
ନିବିଡ଼ ପ୍ରତ୍ୟୟ ଅଦୃଶ୍ୟ ଇଂଗିତ
ଅଭିଷ୍ଟ ପଥର ଯାତ୍ରୀ,
ଶାଶ୍ୱତ ଭାବନା ଭରି ଦିଏ ବାସ୍ନା
ଅନୁରାଗ ଭିଜା ଗୀତି ।