ମୁଁ ନିମିତ୍ତ ମାତ୍ର

ମାଆ ଗୋ ବିରଜା ଜଗତ ଜନନୀ

    ସୃଷ୍ଟିର ଆଦିମୂଳ

ତୁମ ପାଦପଦ୍ମ  କୋଟି ମହାତୀର୍ଥ

   ଦର୍ଶନ ମହାପୂଣ୍ୟ ।

ସ୍ଥୂଳ ଏ ଶରୀର  ତୁମରି ତ ଦାନ

  ମାଆ ଗୋ ଆଦି ଶକତି

ଏ ଭବସାଗର  ଆଲମ୍ବନ କୁଳ

  ମୁକ୍ତିପ୍ରଦା ବୈତରଣୀ

ତୁମେ ମନପ୍ରାଣ  ବିଜ୍ଞାନ ଅନନ୍ୟ

  ମୁଁ ନିମିତ୍ତ ଆତ୍ମା ମାତ୍ର ।

ମାଆ ଗୋ ବିରଜା -----

ଶୋହେ ତୁମ ମାଥେ ଉଜ୍ଜ୍ୱଳ ସିନ୍ଦୂର

   ଲିଙ୍ଗ ଗଣପତି ଚନ୍ଦ୍ର

ଶୂଳ ହସ୍ତେ ମାତ  ବିଦାର ମହିଷା

   ପ୍ରବୃତ୍ତି ପଶୁ ଲାଙ୍ଗୁଳ

ଅବତର ମାତ  ଚଢ଼ି ସିଂହଧ୍ୱଜ

   ନାଶ ରଜତମ ଘୋର ।

ମାଆ ଗୋ ବିରଜା ------

ତୁମେ ମହାମାୟା  ଧ୍ୟାନ ଓ ଧାରଣା

   ବିମଳା ପରମା ସ୍ୱାହା

ମାତା ଅନ୍ନପୂର୍ଣ୍ଣା  ସୁଖଦା ବରଦା

   ଦୁର୍ଗତେ ଭରସା ସାହା

ଦିଅ ଶୁଭାଶୀଷ  ଜୀବନ ପ୍ରଶାନ୍ତି

   ମୁକ୍ତି ଚଉବର୍ଗ ଫଳ ।

ମାଆ ଗୋ ବିରଜା ----