ମୁଁ ମୋ ଉପରେ ଖୁସି

ମୁଣ୍ଡ ଉପରର ଆକାଶଟା ଛିଣ୍ଡି

ମୁଣ୍ଡରେ ହୋଇନି ଛେଚି,

ପାଦତଳ ଭୂଇଁ ଖଣ୍ଡ ଖଣ୍ଡ ହୋଇ

ଫାଟି ଯାଇନିତ ଧସି । [୧]

ଖଣ୍ଡିଆ ଭୂତର ମାଡୁଆ ପବନ

ନେଇ ନାହିଁତ ଉଡେଇ,

ଲଘୁଚାପ ମିଶା ପୂନେଇଁ ଜୁଆର

ଦେଇ ନାହିଁ ତ ଡୁବେଇ। [୨]

ଇନ୍ଦିର ରଜାଙ୍କ ଚଡକ ମାଡରେ

କାନ ହୋଇନି ବଧିର,

ସୂରୂଜର ଅଂଶୁଘାତର ଆଘାତ

ପଠେଇନି ଆରପାର। [୩]

ଆହେ ଚିକିଣିଆ ଛଳିଆ ଦରଦୀ

ଲୋଡା ନାହିଁ କାର ଦୟା,

ପଇସା ଯଚେଇ ରକତ ଶୋଷିବ

ଜାଣିଛି ତୁମରି ମାୟା । [୪]

ଗୋଡହାତ ଚଳି ମଜୁରି ଖଟୁଛି

ପାଉଛି ପାଉଣା ମୋର,

ଦି ଓଳି ଦି ମୁଠା ଖାଇବା ମିଳୁଛି

ସେତିକି ମୋ ଦରକାର । [୫]

ଅବଳା ହେଲେବି ଦୁର୍ବଳା ନୁହେଁ ମୁଁ

କରି ଜାଣେ ଆତ୍ମ ରକ୍ଷା,

ଭାଗ୍ୟ ଠାରୁ ବେଶୀ ସୁଖୀ ହେବାପାଇଁ

ଘୃଣା କରେ ଦୟା ଭିକ୍ଷା । [୬]

ନାକ ପୁଡା ଆଗେ ଆଙ୍ଗୁଠି ରଖିଲେ

ନିଶ୍ୱାସ ଆସୁଛି ଖର,

ମାଟି ଘଟରେ ତ ପ୍ରାଣଟା ରହିଛି

ତେବେ କାହିଁପାଇଁ ଡର । [୭]

ଜଗତ କରତା ହାତ ଯୋଡି ତତେ

ଗୁହାରି ଜଣାଏ ମୁହିଁ,

ମୋ ସୁଲିକୁ ଏମିତି ହସେଇ ହସେଇ

ଖୁସିରେ ରଖିଥା ତୁହି । [୮]