ମୁଁ ବଡ ହେଇ ଯାଇଛି

ମୁଁ ବୋଧେ ବଡ ହେଇଯାଇଛି !

ବିଶ୍ୱାସର ଶିଳାନ୍ୟାସ ପାଇଁ ,

ଅମାନିଆ ଶବ୍ଦ ମାନଙ୍କୁ କାବୁ କରିବା ,

ଏବେ ମୁଁ ଶିଖିଯାଇଛି ।

କୋଉଟା କହିବି ,

କୋଉଟା ନ କହିବିର ଅସମାହିତ ପ୍ରଶ୍ନ ଭିତରେ ,

ମୁଁ ନିଜେ ନିଜର ଉତ୍ତର ସାଜିଛି ।

ଆଖିର ଅର୍ଗଳିରେ ଢେଉ ଭାଙ୍ଗୁଥିବା

ସ୍ବପ ମାନଙ୍କୁ ମୋ ରଙ୍ଗୀନ ପଣତର

ବୋଝ ତଳେ ଚାପି ଧରିଛି ।

ମନର ବାଚାଳତାକୁ ଆଖି ଦେଖେଇ ଚୁପ କରିଦେଇଛି ।

ମୁଁ ବୋଧେ ବଡ ହେଇଯାଇଛି ।

ସାନ ସାନ ସୁଖ ଓ ବଡ ବଡ ଦୁଃଖ ମାନଙ୍କୁ

ମୁଁ ଏବେ ବେଶ ଭାବେ ଚିନ୍ହି ସାରିଛି ।

ଅସରନ୍ତି ସମର୍ପଣର ଭାବକୁ ଅତିକ୍ରମ କରିଯିବାର

ଦର୍ପିତ ଅଭିଯାନ ଏବେ ମୋର ଶେଷ ହେଇଛି ।

କଇଁ କଇଁ ହେଇ ଶେଷ ଥର କେବେ କାନ୍ଦିଥିଲି ,

ମୋର ଆଉ ମନେ ନାହିଁ ।

ତୁମ ପରି ମୁଁ ବି କେବେ ପ୍ରେମରେ ପଡ଼ିଥିଲି !

କାଇଁ ମୋର ତ ଏକଥା ବିଲକୁଲ ମନେ ନାହିଁ !

ଦେଖ , ମୁଁ ବି ଠିକ ତୁମ ପରି ,

ମୋ ଛାତିକୁ ପଥର କରିଦେଇଛି

ମୁଁ ବୋଧେ ବଡ ହେଇଯାଇଛି ।